ရုရှားနိုင်ငံနဲ့ ယူကရိန်းနိုင်ငံတို့ကြားမှာ တင်းမာနေတဲ့ စစ်ရေးအခြေအနေကြောင့် ချန်ပီယံလိဂ်ဗိုလ်လုပွဲနဲ့ လိဂ်ပွဲစဉ်တွေကို ပြောင်းလဲကျင်းပရဖို့ရှိပါတယ်။ 

ဥရောပချန်ပီယံလိဂ်ဗိုလ်လုပွဲကို လာမယ့် မေလ ၂၈ ရက်နေ့ ရုရှားနိုင်ငံ စိန့်ပီတာစ်ဘက်ချ်မြို့မှာ ကျင်းပဖို့ သတ်မှတ်ထားပါတယ်။ 

ဒါပေမဲ့ ရုရှားနဲ့ ယူကရိန်းအရေး ပိုမိုဆိုးရွားလာမယ်ဆိုရင်တော့ တခြားဥရောပနိုင်ငံတစ်နိုင်ငံမှာ ကျင်းပဖို့ ယူအီးအက်ဖ်အေက စဉ်းစားနေပါတယ်။ 

အလားတူ ယူကရိန်းပြည်တွင်း ပရီးမီးယားလိဂ်ဟာ ဆောင်းရာသီအားလပ်ရက်မှာ ခေတ္တရပ်နားခဲ့ပြီး နောက်လာမယ့် သောကြာနေ့ ပြန်လည်စတင်မှာပါ။ 

ဒါပေမဲ့ ရုရှားနဲ့ နိုင်ငံရေးအခြေအနေအပေါ် မူတည်ပြီး အချိန်မရွေး ရပ်တန့်ရဖို့ရှိပါတယ်။ ဒီလိုသာဖြစ်ခဲ့ပါက ယူကရိန်းလက်ရွေးစင်ဘောလုံးအသင်းအတွက်လည်း အကျိုးသက်ရောက်မှုရှိနိုင်ပါတယ်။ 

ယူကရိန်းဟာ စကော့တလန်နဲ့  ကမ္ဘာ့ဖလားနောက်ဆုံးအဆင့် ခြေစစ်ပွဲ ကစားရမှာဖြစ်ပြီး ပြည်တွင်းလိဂ်မရှိခဲ့ပါက အခက်တွေ့လာနိုင်ပါတယ်။  

ယူကရိန်းကလပ် ၂ သင်းဖြစ်တဲ့ ရှက်တာဒိုးနက်နဲ့ ဒိုင်နမိုကိဗ်တို့က ချန်ပီယံလိဂ်ကနေ ထွက်ခဲ့ရလို့ ကိစ္စမရှိတော့ပေမယ့် ဥရောပ ယူ-၁၉ ကလပ်အသင်းပြိုင်ပွဲတော့ရှိနေပါတယ်။ 

ဒိုင်နမိုကိဗ်ယူ-၁၉ အသင်းက စပို့တင်းလစ္စဘွန်းနဲ့ မတ်လအတွင်း ယူကရိန်းနိုင်ငံမှာ ကစားရဖို့ရှိပြီး နိုင်ငံရေးအခြေအနေအရ ပြောင်းလဲကျင်းပရဖို့ရှိပါတယ်။