တောင်ကိုရီးယားနိုင်ငံမှာ ပထမဆုံးအနေနဲ့ တရက်တည်းအတွင်း ကိုဗစ်-၁၉ ကပ်ရောဂါ ကူးစက်ခံ ဦးရေဟာ အယောက် ၁၇၀,၀၀၀ သောင်း ကျော်သွားခဲ့ပေမဲ့ အသည်းအသန်လူနာနဲ့ သေဆုံးသူ အရေအတွက်က စီမံခန့်ခွဲနိုင်တဲ့အဆင့်မှာ ရှိနေတယ်လို့ ကျန်းမာရေးအာဏာပိုင်တွေက ဖေဖော်ဝါရီ ၂၃ ရက်မှာ ပြောလိုက်ပါတယ်။

ဖေဖော်ဝါရီ ၂၂ ရက် တရက်တည်းမှာ အသစ်ကူးစက်ခံ လူနာ ၁၇၁,၄၅၂ ယောက် ရှိခဲ့ပြီး အရင်နေ့က ၉၉,၅၇၃ ယောက်ထက် သိသိသာသာ တိုးလာခဲ့တယ်လို့ ကိုရီးယားရောဂါ ထိန်းချုပ်ရေးနဲ့ ကာကွယ်ရေးအေဂျင်စီ (KDCA)က ပြောပါတယ်။

အင်္ဂါနေ့က ကူးစက်ခံ သေဆုံးသူဦးရေဟာ ၉၉ ယောက်နဲ့ စံချိန်တင် မြင့်တက်ခဲ့ပါတယ်။ ဒါပေမဲ့ ဒယ်လ်တာ ဗီဇမျိုးကွဲ ကူးစက်ခံရသူတွေ အသည်းအသန်ဖြစ်ပြီး သေဆုံးနှုန်းနဲ့စာရင် အိုမီခရွန် ဗီဇမျိုးကွဲ ကူးစက်ခံရသူ အသည်းအသန်ဖြစ်ပြီး သေဆုံးနှုန်းက ၇၅ ရာခိုင်နှုန်းနီးပါး ပိုနည်းပုံရတယ်လို့ တောင်ကိုရီးယား အာဏာပိုင်တွေက ပြောပါတယ်။

ဒီဇင်ဘာလက စပြီး ကူးစက်ခံ အတည်ပြုလူနာ ၆၇,၂၀၀ ကို (KDCA) က ပြုလုပ်ခဲ့တဲ့ လေ့လာချက်အရ အိုမီခရွန် ဗီဇမျိုးကွဲ ကူးစက်ခံရသူ ဝေဒနာပြင်းပြင်းထန်ထန် ခံစားရတဲ့နှုန်းက ပျမ်းမျှ ၀ ဒသမ ၃၈ ရာခိုင်နှုန်းသာရှိပြီး သေဆုံးနှုန်းက ၀ ဒသမ ၁၈ ရာခိုင်နှုန်းရှိပါတယ်။

ဒယ်လ်တာ ဗီဇမျိုးကွဲ ကူးစက်ခံရသူတွေ ပြင်းထန်တဲ့ ဝေဒနာခံစားရတဲ့နှုန်းကတော့ ၁ ဒသမ ၄ ရာခိုင်နှုန်းရှိပြီး ကူးစက်ခံ သေဆုံးနှုန်းက ၀ ဒသမ ၇ ရာခိုင်နှုန်း ရှိတယ်လို့ စစ်တမ်းက ပြထားပါတယ်။