ကလေးမြို့နယ်တောင်ပိုင်းမှာ ဖေဖော်ဝါရီ ၂၃ ရက်နေ့ မနက်ပိုင်းက ဒေသကာကွယ်ရေးညီနောင်မဟာမိတ်တပ်ဖွဲ့တွေနဲ့ စစ်ကောင်စီတပ်တွေ တိုက်ပွဲအတွင်း စစ်ကောင်စီဘက်က ၆ ယောက်လောက်ဒဏ်ရာရပြီး နေအိမ် ၂ လုံးနဲ့ ဆိုင်ကယ်တစ်စီးကို မီးရှို့ဖျက်ဆီးသွားတယ်လို့ CDF-KKG က ပြောပါတယ်။

ကလေးမြို့နယ်ကြံသာရွာနဲ့ ဂန်ဂေါမြို့နယ် ဟံသာဝတီရွာမှာတပ်စွဲထားတဲ့ စစ်ကောင်စီတပ်သားတွေနဲ့ ပျူစောထီးအင်အား ၇၀ လောက်ဟာ မနေ့မနက် ၁၀ နာရီခွဲလောက်မှာ စစ်ကြောင်းနှစ်ကြောင်းခွဲပြီး ထိုးစစ်ဆင်လာတာကြောင့် ဒေသကာကွယ်ရေး ညီနောင်မဟာမိတ်တွေနဲ့ တိုက်ပွဲဖြစ်ပွားခဲ့တာလို့ CDF-KKG ရဲ့ ပြန်ကြားရေးတာဝန်ခံက ဒီဗွီဘီကို ပြောပါတယ်။

“စစ်ကောင်စီတပ်တွေဟာ နဂိုသုံးနေတဲ့ ပြည်ထောင်စုလမ်းမကြီးအတိုင်းမလာဘဲ တောလမ်းကနေ မှန်တောရွာဘက်ကို ဝင်လာတာကြောင့် ညီနောင်မဟာမိတ်တပ်ဖွဲ့တွေနဲ့ ၂ နာရီကြာ တိုက်ပွဲဖြစ်ခဲ့ပြီး CDF-KKG ကထောင်ထားတဲ့ တိုက်မိုင်းတွေကို နင်းမိသလို ကျနော်တို့ဘက်က လက်နက်ကြီးလက်နက်ငယ်တွေနဲ့ ပစ်ခတ်တိုက်ခိုက်လိုက်လို့ ပြန်ဆုတ်သွားကြတယ်” လို့ ပြောပါတယ်။

အဲဒီတိုက်ပွဲကို CDF-KKG၊CDF-ထန်တလန်၊ PDF-ကလေး၊ RKDFနဲ့ ကလေး ပ.က.ဖ တို့ ပူးပေါင်တိုက်ခိုက်ခဲ့တာဖြစ်ပြီး ညီနောင်မဟာမိတ်တပ်ဖွဲ့ဘက်က အထိခိုက်အကျဆုံးမရှိဘဲ နယ်မြေရှင်းလင်းရေးတွေ လုပ်ဆောင်ခဲ့တယ်လို့ ပြောပါတယ်။

ဒါ့အပြင် ရန်ကြီးအောင်ကျေးရွာမှာတပ်စွဲထားတဲ့ စစ်ကောင်စီတပ်တွေဟာ ဖေဖော်ဝါရီ ၂၃ ရက်နေ့က ပြည်သူတွေရဲ့ ဆန်စက်၊ နေအိမ်တွေနဲ့ ဆိုင်ကယ်တွေကို မီးရှို့ဖျက်ဆီးခဲ့လို့ CDF-KKG က မီးငြှိမ်းသတ်ခဲ့ပေမယ့် နေအိမ် ၂ လုံးနဲ့ ဆိုင်ကယ် ၁ ဏီး မီးလောင်ပြာကျခဲ့ရတယ်လို့ ဆိုပါတယ်။

ဂန်ဂေါမြို့နဲ့ ပျားရွာကြားမှာတပ်စွဲထားတဲ့ စစ်ကောင်စီရဲ့ စက်ယန္တရားကုန်းကိုလည်း ဖေဖော်ဝါရီ ၂၂ ရက်နေ့မှာ CDF-KKG တပ်ရင်း-၅ က လက်နက်ကြီးတွေနဲ့ ပစ်ခတ်တိုက်ခိုက်ခဲ့တယ်လို့ သိရပါတယ်။

နှစ်ဖက်တိုက်ပွဲတွေနဲ့ ပတ်သက်လို့တော့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။