မကွေးတိုင်း၊ ရေစကြိုမြို့နယ်မှာ ဖေဖော်ဝါရီ ၂၅ ရက်ညက စစ်ကောင်စီယာဥ်တန်း မိုင်းဆွဲတိုက်ခိုက်ခံရပြီး ထိခိုက်သေဆုံးသူရှိနိုင်တယ်လို့ ရေစကြိုမြောက်ပိုင်း N-YSO ပြောက်ကျားတပ်ဖွဲ့ကနေ သိရပါတယ်။

ရေစကြိုမြို့နယ် ချောင်းဦး-ရေစကြို ကားလမ်းမှာ မနေ့က ည ၈ နာရီခွဲလောက်က စစ်ယာဥ်တန်း ကား ၂ စီးအနက် ဖောကားတစ်စီးကို N-YSO ပြောက်ကျားတပ်ဖွဲ့နဲ့ ငဘဒေသပြည်သူကာကွယ်ရေး ပြောက်ကျားတပ်တို့ ပူးပေါင်းကာ ပဒေသာမိုင်းဆွဲ ပြီးတိုက်ခိုက်ခဲ့တာဖြစ်ပြီး စစ်ကောင်စီဘက်က ထိခိုက်သေဆုံးသူရှိနိုင်တယ်လို့ N-YSO ပြောက်ကျားတပ်ဖွဲ့ရဲ့ ပြန်ကြားရေးတာဝန်ခံက ပြောပါတယ်။

“စစ်ကောင်စီတပ်တွေဟာ အင်အား ၃၀ လောက်နဲ့ လူမှုကူညီရေးကားတစ်စီးရယ်၊ ဖောကား အဖြူတစ်စီးရယ် အသုံးပြုပြီးတော့ ဖြတ်လာတာဗျ။ လူမှုကူညီရေးကားပေါ်မှာ ပြည်သူတစ်ယောက်ပါတယ်လို့ ကြာသိရလို့ အဲဒီကားကိုရှောင်ပြီး အနောက်က ဖောကားကို ပဒေသာမိုင်းခွဲပြီးတိုက်ခိုက်တာ။”

အရှေ့လူမှုကူညီရေးကားပေါ်မှာ ပါတဲ့ စစ်ကောင်စီတပ်သားတွေက သေနတ်တွေနဲ့ ပြန်လည်ပစ်ခတ်တာကြောင့် စစ်ကောင်စီတပ်သား ထိခိုက်သေဆုံးတဲ့ အခြေအနေကို မသိရဘဲ PDF ရဲဘော်တွေ အထိခိုက်အကျဆုံးမရှိဘဲ အောင်အောင်မြင်မြင် ဆုတ်ခွာနိုင်ခဲ့တယ်လို့ ပြောပါတယ်။

ရေစကြိုမြို့နယ် ပခုက္ကူ-ချောင်းဦးလမ်းမှာ မနေ့က ညနေ ၄ နာရီလောက်မှာလည်း ရေနံကားတွေကို လိုင်းကြေးကောက်နေတဲ့ စစ်ကောင်စီတပ်က ဗိုလ်တစ်ယောက်နဲ့ တပ်သားတစ်ယောက်ကို ရေစကြို PDFက ပစ်ခတ်ခဲ့ သိရပါတယ်။

စစ်အာဏာရှင် ပြုတ်ကျရေးအတွက် အဆုံးသတ်တိုက်ပွဲမို့လို့ မိဘပြည်သူတွေအနေနဲ့ ရှိသမျှအင်အားနဲ့ မိမိတို့ တတ်နိုင်တဲ့နေရာကနေ ပူးပေါင်းပါဝငပေးကြဖို့လည်း တိုက်တွန်းထားပါတယ်။

အဲဒီ မိုင်းဆွဲတိုက်ခိုက်ခံရတဲ့ ဖြစ်စဥ်နဲ့ ပတ်သက်လို့တော့ ထိခိုက်သေဆုံးတဲ့ အခြေ အနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။