အခါတစ်ပါးမှာ မြတ်စွာဘုရားရှင်ဟာ ရာဇဂြိုဟ်ပြည် ရှဉ့်နက်တို့ကို အစာကျွေးရာ ဖြစ်သော ဝေဠုဝန်ကျောင်း၌ (သီတင်းသုံး) နေတော်မူခဲ့တဲ့အချိန်မှာ အသျှင်လက္ခဏနဲ့ အသျှင်မဟာမောဂ္ဂလာန်တို့ဟာလည်း ဂိဇ္ဈကုဋ်တောင်မှာ (သီတင်းသုံး) နေကြပါသတဲ့။ တနေ့မှာတော့ အသျှင်မဟာမောဂ္ဂလာန်နဲ့ အသျှင်လက္ခဏတို့ ရာဇဂြိုဟ်ပြည်သို့ ဆွမ်းခံဝင်ကြရင်း အသျှင်မဟာမောဂ္ဂလာန်ဟာ ဂိဇ္ဈကုဋ်တောင်အဆင်းနေရာတစ်ခုမှာ ပြုံးတော်မူပါသတဲ့။ အဲ့ဒီအခါမှာ အသျှင်လက္ခဏက အသျှင်မဟာမောဂ္ဂလာန်ကို ဘာအတွက် ပြုံးရယ်ရသလဲလို့လျှောက်ပါသတဲ့၊ ငါ့သျှင်လက္ခဏ ဤပြဿနာကို ဖြေခြင်းငှာ အခါ မဟုတ်သေး၊ မြတ်စွာဘုရားအထံမှာ ငါ့အား ဤပြဿနာကို မေးပါဟု ပြောဆိုခဲ့ပါသတဲ့။

ဆွမ်းစားပြီးတဲ့နောက် မြတ်စွာဘုရားထံပါး ချဉ်းကပ်ကြပြီး အသျှင်လက္ခဏက အသျှင်မဟာမောဂ္ဂလာန်အား " ပြုံးရယ်ခြင်း၏ အကြောင်းအထောက်အပံ့ကား အဘယ်ပါနည်း'' လို့ မေးလျှောက်ခဲ့တဲ့အခါ " ငါ့သျှင် ငါသည် ဂိဇ္ဈကုဋ်တောင်မှ ဆင်းသက်လတ်သော်ကောင်းကင်၌ သွားနေသော အရိုးစုပြိတ္တာကို မြင်ရ၏၊ ထိုအရိုးစုပြိတ္တာကို လင်းတ၊  ကျီးငှက်၊ စွန်ရဲတို့သည် လိုက်၍ လိုက်၍ နံရိုးကြားတို့၌ ထိုးဆိတ်ကြကုန်၏၊ ထိုပြိတ္တာသည် နာကျင်သော အသံကို ပြု၏၊ ငါ့သျှင် ထိုငါ့အား ''ဤကဲ့သို့သော ပြိတ္တာဟု ရှိရတုံဘိ၏၊ ဤကဲ့သို့သော အတ္တဘောကို ရသူဟု ရှိရတုံဘိ၏ဟု အကြံ ဖြစ်ခဲ့ပါသည်ဟု ဖြေကြားခဲ့ပါတယ်။

အဲဒီအခါမှာ မြတ်စွာဘုရားရှင်က တပည့်သာဝကကြီး အသျှင်မဟာမောဂ္ဂလာန်ရဲ့ ဉာဏ်မျက်စိအမြင်ရှိပုံကို ချီးမွမ်းခဲ့ရင်း ရဟန်းတို့ ထိုသတ္တဝါသည် ရာဇဂြိုဟ်ပြည်၌ပင် နွားသတ်သမားဖြစ်ခဲ့ဖူးပြီ၊ ထိုသတ္တဝါသည် ထိုကံ၏ အကျိုးဖြင့် များစွာသော နှစ်တို့ပတ်လုံး များစွာသော နှစ်အရာတို့ပတ်လုံး များစွာသော နှစ်အထောင်တို့ ပတ်လုံး များစွာသော နှစ်အသိန်းတို့ပတ်လုံး ငရဲ၌ ကျက်ခဲ့၍ ထိုကံ၏ အကျိုးကြွင်းဖြင့်လျှင် ဤသို့သော အတ္တဘောကို ရရှိခံစားနေရ၏'' လို့ ဟောတော်မူခဲ့ပါတယ်။

ငါ့သျှင် ငါသည် ဂိဇ္ဈကုဋ်တောင်မှ ဆင်းသက်လတ်သော် ကောင်းကင်၌ သွားသော မြားအမွေးပေါက်သော ယောကျ်ားပြိတ္တာကို မြင်ရ၏၊ ထိုပြိတ္တာ၏ မြားအမွေးတို့သည် ပျံတက်၍ ပျံတက်၍ ထိုပြိတ္တာ၏ ကိုယ်၌ပင် ကျရောက်ကုန်၏၊ ထိုပြိတ္တာသည် နာကျင်သော အသံကို ပြု၏။ ပ။ ရဟန်းတို့ ထိုသတ္တဝါ သည် ဤရာဇဂြိုဟ်ပြည်၌ပင် လက်မရွံ့အာဏာသား ဖြစ်ခဲ့ဖူးပြီ။

ငါ့သျှင် ငါသည် ဂိဇ္ဈကုဋ်တောင်မှ ဆင်းသက်လတ်သော် ကောင်းကင်၌ သွားသော လှံအမွေးပေါက်သော ယောကျ်ားပြိတ္တာကို မြင်ရ၏၊ ထိုပြိတ္တာ၏ ထိုလှံအမွေးတို့သည် ပျံတက်၍ ပျံတက်၍ ထိုပြိတ္တာ၏ ကိုယ်၌ပင် ကျရောက်ကုန်၏၊ ထိုပြိတ္တာသည် နာကျင်သော အသံကို ပြု၏။ပ။ ရဟန်းတို့ ထိုသတ္တဝါသည် ဤရာဇဂြိုဟ်ပြည်၌ပင် သားသတ်သမား ဖြစ်ခဲ့ဖူးပြီ။ 

ငါ့သျှင် ငါသည် ဂိဇ္ဈကုဋ်တောင်မှ ဆင်းသက်လတ်သော် ကောင်းကင်၌ ပျံသွားသော အိုး ပမာဏမျှ ဝှေးစေ့ရှိသော ယောကျ်ားပြိတ္တာကို မြင်ရ၏၊ ထိုပြိတ္တာသည် သွားသော်လည်း ထိုဝှေးစေ့တို့ကို သာလျှင် ပခုံး၌ တင်၍ သွားရလေ၏၊ ထိုင်သော်လည်း ထိုဝှေးစေ့တို့၌သာလျှင် ထိုင်ရ၏၊ ထိုပြိတ္တာကို လင်းတ၊ ကျီးငှက်၊ စွန်ရဲတို့သည် လိုက်၍ လိုက်၍ ထိုးဆိတ်ကုန်၏၊ ထိုပြိတ္တာသည် နာကျင်သော အသံကို ပြု၏။ပ။ ရဟန်းတို့ ထိုသတ္တဝါသည် ဤရာဇဂြိုဟ်ပြည်၌ပင် စဉ်းလဲကောက်ကျစ်သော တရားသူကြီး ဖြစ်ခဲ့ဖူးပြီ လို့စသည်ဖြင့် နောက်ထပ်ပြိတ္တာများအကြောင်း ထပ်လောင်းဟောကြားခဲ့ပါတယ်။

ပိဋကသုံးပုံထဲက သံယုတ္တနိကာယ်ထဲမှာ ယုတ်မာသူတို့သည် သူတို့ကံ၏ အကျိုးဖြင့် များစွာသော နှစ်တို့ပတ်လုံး များစွာသော နှစ်အရာတို့ပတ်လုံး များစွာသော နှစ်အထောင်တို့ပတ်လုံး များစွာသော နှစ်အသိန်းတို့ပတ်လုံး ငရဲ၌ ကျက်ခဲ့ရ၍ ထိုကံ၏ အကျိုးကြွင်းဖြင့်ပင်လျှင် ပြိတ္တာအတ္တဘောကို ရရှိခံစားနေရ၏'' လို့ ပါပါတယ်။

ဒီနေရာမှာကြားဖြတ်လို့ ပြိတ္တာ” ဆိုတဲ့စကားရပ်အကြောင်းအကျဉ်းရေးပြချင်ပါတယ်။ “ပေတ္တိ” ဆိုတဲ့ ပါဠိဘာသာစကားမှဆင်းသက်လာတာဖြစ်ပြီး ချမ်းသာသုခအပေါင်းမှ ဝေးကွာတဲ့သတ္တဝါ‌တွေကို ပေတ =“ပြိတ္တာ” လို့အဓိပ္ပါယ်ဖွင့်ဆိုနိုင်ပါတယ်။

ပြိတ္တာတွေဟာ လူ့ပြည်လောကအတွင်းမှာပင် တောတောင်၊ မြစ်ချောင်း၊ တောင်စောင်း၊ လိုဏ်ဂူ၊ သုဿန် စသောအရပ်များကို မှီခိုလို့ ဆင်းရဲစွာ ခံစားနေရတဲ့သတ္တဝါတစ်မျိုး ဖြစ်ပါတယ်။ တရုတ်၊ အာရှအရှေ့ဖြားနဲ့ အရှေ့တောင်အာရှနိုင်ငံတွေမှာတော့ အင်္ဂလိပ်လို Hungry Ghost လို့‌ခေါ်ဆိုကြပါတယ်။

နိုင်ငံတော် သြဝါဒါစရိယ၊ မြန်မာစာသြဝါဒါစရိယ ထီးချိုင့်မြို –တည်တောဆရာတော်ဘုရားကြီးရဲ့ယနေ့ဗုဒ္ဓဝါဒဆိုင်ရာ အမေးအဖြေများ အတွဲ(၁)မှာတော့ 

(၁) ရတနာသုံးပါးကို ပြစ်မှားတဲ့ပုဂ္ဂိုလ်, သီလရှိတဲ့ သူတော်ကောင်းများကို ပြစ်မှားတဲ့သူ

(၂) စက်ဆုပ်ဖွယ်အရာဝတ္ထုများကို မရိုမသေပေးတတ်တဲ့သူ

(၃) သူတော်ကောင်းများရဲ့ အစာထဲ ရွံရှာဖွယ်တွေ ထည့်ကျွေးတဲ့သူ

(၄) ပူလောင်တဲ့အစာမျိုး မရိုမသေကျွေးခဲ့ဖူးသူ

(၅) သူတစ်ပါးအလှူ ပိတ်ပင်ခဲ့ဖူးသူ

(၆) ဆိုးမိုက်တဲ့စိတ်ဖြင့် ရေတွင်းရေကန်များကိုဖျက်ဆီးသူ

(၇) သက်ကြီးသူအိုတို့ကို မရိုမသေ မလေးမစားစော်ကားသူ

(၈) မုဒိမ်းမှုကျူးလွန်သူ

(၉) သူတစ်ပါးဆောက်လုပ်လှူဒါန်းထားတဲ့ ပြာသာဒ်, ကျောင်း, သိမ် စသည်များကို မီးတိုက်ဖျက်ဆီးသူ

(၁၀) သူတစ်ပါးကိုကြောက်အောင် ခြောက်လှန့်သူ

၁၁) ကုသိုလ်ကောင်းမှုကို တစ်ဘက်ကပြုပြီး တစ်ဘက်က အကျင့်ပျက်သူ

(၁၂) ကုသိုလ်နဲ့အကုသိုလ် ရောစပ်နေတဲ့ မိဿကကံပြုသူတွေဟာ ပြိတ္တာအမျိုးမျိုးကွဲပြားစွာဖြစ်ပြီး ဒုက္ခခံစားကြရတယ်လို့ ဖြေဆိုထားပါ။

“ပြိတ္တာတွေဟာ နှစ်ပေါင်းများစွာ မစားရ မသောက်ရဘဲ တချို့မှာ လူတွေရဲ့ ထမင်းလုံး၊ ဟင်းသိုး၊ သလိပ်၊ ချွဲ၊ တံတွေး၊ မစင်၊ အရိအရွဲ စတာ‌တွေကိုသာ စားသောက်ကြရပါသတဲ့။

ဂိဇ္ဈကုဋ်တောင်မှာနေတဲ့ ပြိတ္တာတွေဟာ ငရဲသားတွေလိုပဲ လွန်စွာဆင်းရဲဒုက္ခရောက်ရပါသတဲ့။ မိမိပြုခဲ့တဲ့ မကောင်းမှုကြောင့် ထမင်းငတ်ခြင်း၊ ရေမွတ်သိပ်ခြင်း စတဲ့ ဆင်းရဲတွေကို ခံစားရပြီး နှစ်ပေါင်းရာထောင် သိန်းသန်းမက ဘုရားတစ်ဆူနဲ့ တစ်ဆူအကြားထိ မကျွတ်မလွတ်နိုင်ဘဲ နေကြရပါတယ်။

အဲ့ဒီလောက်ကြာတဲ့ ကာလပတ်လုံး ထမင်းတစ်လုံး ရေတစ်ပေါက်မျှ မစားမသောက်ရဘဲ မိမိပြုခဲ့တဲ့ အကုသိုလ်ကံမကုန်သေးသရွေ့ သေဆုံးခြင်းမရှိဘဲ အသားအသွေးမရှိ အရေအကြော အရိုးများသာရှိပြီး အလွန်ဆိုးရွားတဲ့ ကြောက်ရွံ့ ထိတ်လန့်ဖွယ်ရာ ရုပ်အဆင်းနဲ့ တည်ရှိကြရတယ်လို့ဆိုပါတယ်။

အခုလည်း မြန်မာနိုင်ငံမှာ အမျိုးဘာသာ သာသနာအရေခြုံထားပေမဲ့ အတွင်းစိတ် သန္ဓေယုတ်ညံ့သိမ်ဖျင်းလှတဲ့ စစ်အခွင့်ထူးခံဗိုလ်ယုတ်တွေဟာ သူတို့စစ်ရေးအသာစီးရရေးအတွက် ပြည်သူတွေရဲ့မြို့ရွာတွေအပေါ် တိုက်လေယာဉ်တွေ၊ ရဟတ်ယာဉ်တွေနဲ့ဗုံးကြဲ၊ လူနေအိမ်ခြေတွေကိုလက်နက်ကြီးနဲ့ထု၊ ပြည်သူလူထုကို အရှင်လတ်လတ်မီးရှို့သတ်ဖြတ်၊ မတရားမှုကို လက်မခံဘဲရဲရဲဝံ့ဝံ့ဆန့်ကျင်ကြတဲ့ နိုင်ငံသားတွေရဲ့အိမ်ရာတွေကိုချိတ်ပိတ်၊ ဘုရားကျောင်းကန်တွေ၊ ပြည်သူပိုင်ဈေးတွေကို မီးရှို့ဖျက်ဆီးစတဲ့ အယုတ်မာဆုံးနည်းလမ်းတွေနဲ့ စစ်ရာဇဝတ်မှု အကုသိုလ်ကံအကျိူးဆက်တွေကြောင့် နှစ်အသိန်းတို့ပတ်လုံး ငရဲမှာ ကျခံရပြီးတဲ့နောက် အဲဒီ အကုသိုလ်ကံ‌တွေရဲ့ အကျိုးကြွင်းဖြင့်ပင်လျှင် ပြိတ္တာအတ္တဘော‌တွေကို ရပြီး ဝဋ်ခံကြရဦးမယ်ဆိုတာကို ညွှန်ပြနေတာပဲ ဖြစ်ပါတယ်။

ဒီရက်ပိုင်းအတွင်း ဆိုရှယ်မီဒီယာတွေ၊ သတင်းဌာနတွေမှာ ဖတ်ရှုခဲ့ရတဲ့ အကြမ်းဖက်အာဏာလုစစ်ကကောင်စီရဲ့လတ်တလောကျူးလွန်‌နေကြတဲ့ အကုသိုလ်ကံကြီးတွေ ယုတ်မာရမ်းကားမှုတွေထဲကတချို့ကို စာဖတ်သူတို့ မြင်သာအောင် ထုတ်နုတ်ရေးပြချင်ပါတယ်။

ပြီးခဲ့တဲ့ ဖေဖော်ဝါရီ ၁၆ ရက်နေ့က ရှမ်းပြည်နယ်တောင်ပိုင်း၊ မိုးဗြဲမြို့မှာ အာဏာလုစစ်ကောင်စီတပ်နဲ့ကရင်နီပူးပေါင်းတပ်‌တွေ အကြား တိုက်ပွဲစတင်ခဲ့ပြီး စစ်ကောင်စီက လက်နက်ကြီး‌တွေ၊ လေကြောင်းပစ်ကူတွေနဲ့ အပြင်းအထန် ထိုးစစ်ဆင်ခဲ့ပါတယ်။

အရပ်သားပြည်သူတွေကိုပစ်မှတ်ထားတိုက်ခိုက်သတ်ဖြတ်နေတာမို့ ကယားပြည်နယ် (ကရင်နီပြည်နယ်) ဆိုတာ ပြည်နယ်သေးသေးလေးပေမယ့် စစ်ကောင်စီ အာဏာလုပြီးချိန် ကစပြီး စာရင်းအရ စစ်ဘေးရှောင်ပြည်သူ ၁ သိန်း ၇ သောင်းထိအတိဒုက္ခရောက်နေကြရတာဖြစ်ပါတယ်။

ဖေဖော်ဝါရီ ၂၃ ရက်ညနေကလည်း ကယားပြည်နယ်၊ ဒီးမော့ဆိုမြို့နယ်၊ နန်းမယ်ခုံမြို့ကို စစ်ကောင်စီလေတပ်က လာရောက် ဗုံးကြဲခဲ့တာ‌ကြောင့် အရပ်သား ၃ ဦး ပွဲချင်းပြီးသေဆုံးလို့ ၅ ဦး ဒဏ်ရာရခဲ့ပါတယ်။

စစ်ကိုင်းတိုင်း ကောလင်းမြို့နယ် ကျောက်ပြင်သာအုပ်စု မင်းကုန်းရွာထိပ်တောင်ကုန်းမှာ ဖေဖော်ဝါရီလ ၂၃ ရက်ကလည်း အကြမ်းဖက်စစ်ကောင်စီတပ်ဖွဲ့‌တွေက သတ်ဖြတ်ထားတဲ့ ရုပ်အလောင်း ၄လောင်းတွေ့ရှိခဲ့ရပြီး အမျိုးသမီး ၂ ဦးမှာ မုဒိမ်းကျင့် သတ်ဖြတ်ခံရခြင်းဖြစ်ကြောင်း ကောလင်းတော်လှန်ရေးတပ်ဖွဲ့ Kawlin Revolution-KR အဖွဲ့ထံမှ သိရတယ်ဆိုတဲ့ သတင်းတွေဖတ်ရပါတယ်။

စစ်တပ်က မုဒိမ်းကျင့် သတ်ဖြတ်ခဲ့သော အမျိုးသမီး ၁ ဦးဟာ CDM ပြုလုပ်ထားတဲ့ အထွေထွေအုပ်ချုပ်ရေးဦးစီးဌာန ဝန်ထမ်းစာရေးမ ဖြစ်တယ်လို့သိရပါတယါ။ 

အဲ့ဒီ အကြမ်းဖက် စစ်ကောင်စီ စစ်ကြောင်းဟာဖေဖော်ဝါရီလ ၂၂ ရက်နေ့မှာ ကောလင်းမြို့နယ် ကုက္ကိုကုန်းရွာရှိ ဆေးခန်းတစ်ခုကို မီးရှို့ကာ ဆေးပစ္စည်းများကို ဖျက်ဆီးခဲ့ပြီး ဥမင်ကုန်းရွာရှိ ပြည်သူပိုင် နေအိမ်တွေကိုလည်း လက်နက်ကြီးတွေနဲ့ ပစ်ခတ်ဖျက်ဆီးခဲ့ကြောင်းလည်းသိရပါတယ်။

အာဏာလုစစ်ကောင်စီက တနိုင်ငံလုံးအတိုင်းအတာနဲ့ ချိတ်ပိတ်ထားတဲ့ အိမ်နဲ့အဆောက်အဦ အလုံးရေ ၁၇၀ နီးပါး ရှိနေပြီး နောက်ထပ်ချိတ်ပိတ်မဲ့ အနုပညာရှင် ၂၀ ရဲ့အိမ်စာရင်းတွေလည်း ထပ်ထွက်လာပါတယ်။

ဒီဗွီဘီတီဗွီသတင်း‌ထဲမှာ ဖေဖော်ဝါရီ ၂၃ ရက်နေ့က စစ်ကိုင်းတိုင်း ကလေးမြို့နယ် ချောင်းခွကျေးရွာမှာ စစ်ဘေးရှောင်နေတဲ့ ယာတောကို စစ်ကောင်စီတပ်သားတွေက ရောက်ရှိလာပြီး စစ်ဘေးရှောင်သားအမိ ၃ ဦးကို ယာခင်းထဲမှာ မီးရှို့သတ်ဖြတ်ခံခဲ့ရတဲ့သတင်းကိုဖတ်ရှုခဲ့ရပါတယ်။

မီးရှို့အသတ်ခံရတဲ့သူတွေဟာ နိုင်ငံရေးလှုပ်ရှားမှုတွေမှာ မပါဝင်ဘဲ စစ်ဘေးရှောင်နေတဲ့ အပြစ်မဲ့ပြည်သူတွေဖြစ်တယ်လို့ ဒေသခံတွေကပြောတယ်လို့ဖေါ်ပြထားပါတယ်။

နောက်တခါ စစ်ကိုင်းတိုင်း၊ ရွှေဘိုမြို့နယ် အရှေ့ဘက် အိမ်ခြေ ၁၉၀ ဝန်းကျင်ခန့်ရှိတဲ့ ငါးပိအိုးကျေးရွာကို စစ်ကောင်စီတပ်က ဖေဖော်ဝါရီ ၂၄ ရက် ည ၉ နာရီကျော် လက်နက်ကြီးတွေနဲ့ ပစ်ခတ်မီးရှို့၊ ခဲ့တာကြောင့် ရွာသား၂ ဦး သေဆုံးပြီး အိမ်ခြေ ၁၀၀ ကျော် ပြာကျခဲ့တဲ့သတင်းကို ဒီဗွီဘီမှာဖတ်ရှုခဲ့ရပါတယ်။

အဲ့ဒီလို ခွင့်မလွှတ်ထိုက်တဲ့ စစ်ရာဇဝတ်မှုကုဋေကုဋာကို အထပ်ထပ် ကျူးလွန်လို့ လာခြင်း မကောင်းသလို လားရာလည်းဆိုးရွားမဲ့ ပြည်သူသတ် လက်မရွှံ့အာဏာသား စစ်မိစ္ဆာတသိုက်နဲ့ လက်ပါးစေတွေဟာ သူတို့ကျုးလွန်တဲ့အကုသိုလ်ကံဆိုး အမျိုးမျိုးရဲ့အကျိုးဆက်တွေကြောင့် ဂိဇ္ဈကုဋ်တောင်က အရိုးစု၊ မြားအမွေးပေါက်၊ လှံအမွှေးပေါက်၊ ဝှေးစေ့ပြိတ္တာများထက်ပိုအဖြစ်ဆိုးမဲ့ ကြပ်ပြေးနေပြည်တော်နားက တောင်ခြေတွေမှာပေါ်ထွန်းလာမဲ့ စစ်ပြိတ္တာတွေဖြစ်လာကြရင် ရှေ့သွားနမူနာများအတိုင်း ထိတ်လန့်ဖွယ် နာကျင်အော်ဟစ်ငိုယို ခံစားဝဋ်ခံကြရမှာ ဖြစ်ပါကြောင်း။

မင်းကောင်းချစ်