စစ်ကိုင်းတိုင်း ယင်းမာပင်ခရိုင် ယင်းမာပင်မြို့နယ်မှာ ဒီနေ့ မတ် ၄ ရက် မနက် ၁၀ နာရီလောက်က စစ်ကောင်စီတပ်ဖွဲ့ မိုင်းဆွဲတိုက်ခိုက်ခံရပြီး အကျအဆုံး များပြားခဲ့တယ်လို့ သိရပါတယ်။

စစ်ကောင်စီတပ်ကို မုံရွာ-ယာကြီး-ကလေးဝ လမ်းပိုင်း ၅ မိုင်တိုးဂိတ်အနီးမှာ PDF ပူးပေါင်းအဖွဲ့တွေက မိုင်းအလုံး ၃၀ ကျော်နဲ့ တိုက်ခိုက်ခဲ့တာလို့ တိုက်ခိုက်ရာမှာပါဝင်တဲ့ Regional Friend Fighters အဖွဲ့ဝင်တဦးက ပြောပါတယ်။

မိုင်းဆွဲတိုက်ခိုက်ခံရမှုကြောင့် စစ်ကောင်စီတပ်သား ၁၀ ဦးထက်မနည်း နေရာမှာတင် သေဆုံးသွားခဲ့ပြီး  ၂၀ ကျော်လောက် ထိခိုက်ဒဏ်ရာ ရရှိခဲ့ကြောင်း၊ ဒဏ်ရာရရှိသူတွေကိုတော့ သံပြားကာ ကား  ၂ စီးနဲ့ မုံရွာဘက်ကို ပြန်လည်သယ်ဆောင်သွားကြတယ်လို့ ဆိုပါတယ်။ 

စစ်ကောင်စီတပ်ဖွဲ့တွေဟာ အင်အား ၁၀၀ ကျော်လောက်နဲ့ အောင်ဇေယျကွက်သစ် (ဒေသခေါ် ရွှေတောင်ဦးကုန်း) ဘက်ကနေ မုံရွာ-ယာကြီး-ကလေးဝ ကားလမ်းအတိုင်း အနောက်ဘက်ကို ဦးတည်ထွက်ခွာလာစဉ် အခုလို မိုင်းဆွဲတိုက်ခိုက်ခံလိုက်ရတာလို့ သိရပါတယ်။

စစ်ကောင်စီတပ်ဖွဲ့တွေ ချီတက်လာစဉ် လမ်းဘေးဝဲယာ တလျှောက်က ဒေသခံ ပြည်သူတွေ နေအိမ်တွေမှာ မနေရဲကြဘဲ ထွက်ပြေးတိမ်းရှောင်ခဲ့ကြရတယ်လို့ ဒေသခံတွေက ပြောပါတယ်။

ယင်းမာပင်မြို့နယ်ဟာ လက်ရှိအချိန်ထိ အင်တာနက် ဖြတ်တောက်ခံထားရတဲ့ ဒေသတခုဖြစ်ပြီး ဒီရက်ပိုင်းအတွင်းမှာလည်း စစ်ကောင်စီတပ်ဖွဲ့တွေက ပြည်သူတွေကို သတ်ဖြတ်တာ၊ နေအိမ်တွေကို မီးရှို့တာတွေ ပြုလုပ်ခဲ့သလို စစ်ကောင်စီရဲ့ အုပ်ချုပ်ရေးယန္တရား ပျက်ပြားနေတဲ့မြို့နယ်လည်း ဖြစ်ပါတယ်။