ထိုင်းနိုင်ငံဘက်က တရားမဝင် နယ်စပ်ဖြတ်ကျော် ဝင်ရောက်လာတဲ့ မြန်မာနိုင်ငံသား ရွေ့ပြောင်းလုပ်သား  အယောက် ၄၀ ကို နိုင်ငံအနောက်ဘက် ဆန်ခလာဘူရီနဲ့ ထောင်ဖာဖွန်ခရိုင်တွေထဲမှာ ထိုင်းရဲတပ်ဖွဲ့က ဖမ်းမိခဲ့တယ်လို့ ဘန်ကောက်ပို့စ်သတင်းမှာ ဖော်ပြပါတယ်။

မတ် ၂၀ နဲ့ ၂၁ ရက်နေ့တွေမှာ အုပ်စု ၆ စု ဖမ်းဆီးနိုင်ခဲ့တာဖြစ်ပြီး ဖမ်းမိသူတွေထဲမှာ မြန်မာ အမျိုးသား ၂၄ ယောက်နဲ့ အမျိုးသမီး ၁၆ ယောက်ပါဝင်တယ်လို့ ဆိုပါတယ်။

ဒါ့အပြင် သူတို့ကို နိုင်ငံတွင်း လမ်းပြကူညီခေါ်ဆောင်လာတဲ့ ထိုင်းနိုင်ငံသား အမျိုးသား ၃ ယောက်နဲ့ အမျိုးသမီး ၃ ယောက်တို့ကိုပါ ရဲတပ်ဖွဲ့က ဖမ်းမိခဲ့တာပါ။

စစ်ဆေးမေးမြန်းချိန်မှာတော့ သူတို့ဟာ မြန်မာနိုင်ငံ မော်လမြိုင်၊ ရန်ကုန်၊ ပဲခူးနဲ့ ရခိုင်ဒေသတွေကနေ ထိုင်းနိုင်ငံ၊ ဆမွတ်စာခွန်း၊ ရာယောင်း၊ ကန်ချနဘူရီနဲ့ ဘန်ကောက်တို့မှာ အလုပ်လုပ်ကိုင်နိုင်ဖို့ တယောက်ကို ပွဲစားခဘတ် ၁ သောင်းခွဲကနေ ၂ သောင်းကြားစီ ပေးပြီး လာရောက်ခဲ့ကြတာလို့ ဆိုပါတယ်။

လတ်တလောမှာတော့ သူတို့ကို ဥပဒေကြောင်းအရ လိုအပ်တဲ့ စစ်ဆေးမှုတွေ လုပ်ဆောင်နေပြီး နေရပ်ပြန်ပို့နိုင်ရေး ဆောင်ရွက်သွားမယ်လို့ သတင်းမှာ ဖော်ပြပါတယ်။