စစ်ကိုင်းတိုင်း ကလေးခရိုင် မင်းကင်းမြို့နယ်မှာ မတ် ၂၃ ရက် မနက် ၅ နာရီကျော်လောက်က စစ်ကောင်စီတပ်နဲ့ ဒေသခံ PDF ပူးပေါင်းအဖွဲ့တို့ တိုက်ပွဲဖြစ်ပွားခဲ့တယ်လို့ ဒေသခံတွေက ပြောပါတယ်။

မင်းကင်းမြို့နယ်၊ တောင်တွင်းဒေသ၊ ကျော်ရွာ၊ ကြာပင်ရွာနဲ့ အိန္ဒိယဆိုက်အနီး စတဲ့နေရာ ၃ ခုတို့မှာ တပ်စွဲနေထိုင်တဲ့ စစ်ကောင်စီအဖွဲ့တွေကို ဒေသခံ PDF ပူးပေါင်းအဖွဲ့တွေက တိုက်ခိုက်ခဲ့တာလို့ ဆိုပါတယ်။

ကြာပင်ရွာနဲ့ အိန္ဒိယလမ်းဆိုက်အနီးမှာရှိတဲ့ စစ်ကောင်စီတပ်ဖွဲ့တွေကို MKPDF တပ်ရင်း  ၂၊ တပ်ခွဲ ၁ နဲ့ TPDF တပ်ရင်း ၂၊ တပ်ခွဲ ၁ အဖွဲ့တို့က နေရာ ၂ ခုခွဲပြီး တပြိုင်တည်း တိုက်ခိုက်ခဲ့တယ်လို့ PDF ခေါင်းဆောင်တဦးက ပြောပါတယ်။

ဒါ့အပြင် ကျော်ရွာမှာ တပ်စွဲနေထိုင်တဲ့ စစ်ကောင်စီတပ်နဲ့ ပျူစောထီး ပူးပေါင်းအဖွဲ့တို့ဟာ ပြည်သူ့စစ်သင်တန်းဖွင့်ဖို့ စီစဉ်နေတာကြောင့် ယင်းမာပင်မှ ရွှေတြိဂံအဖွဲ့၊ ကနီမြို့နယ်မှ ကျောက်တလုံးအဖွဲ့၊ မင်းကင်းမြို့နယ်၊ တောင်တွင်းဒေသမှ ရွှေသမင်မုဆိုးအဖွဲ့တို့ ပူးပေါင်းပြီး တိုက်ခိုက်ခဲ့တယ်လို့လည်း ဆိုပါတယ်။

ကျော်ရွာမှာ တပ်စွဲနေထိုင်တဲ့ စစ်ကောင်စီအဖွဲ့ဟာ မတ် ၂၂ ရက် နေ့လယ်ပိုင်းက ကျော်ရွာမှာနေထိုင်တဲ့ ဦးကျောက်ခဲနေအိမ်က ဆန်အိတ်အပါဝင် စားဆီ ၂ ပုံးနဲ့ ဝက် ၇ ကောင်တို့ကို ယူဆောင်သွားခဲ့ကြသလို ဝက်ခြံနဲ့ ကြက်ခြံကိုလည်း မီးရှို့ဖျက်ဆီးသွားခဲ့တယ်လို့ ဒေသခံတဦးက ပြောပါတယ်။

နှစ်ဘက်ထိတွေ့တိုက်ပွဲအတွင်းမှာ စစ်ကောင်စီဘက်က ၁၅ ဦးလောက် ကျဆုံးပြီး PDF ပူးပေါင်းအဖွဲ့ဘက်မှ ၂ ဦး ကျဆုံးခဲ့သလို ၄ ဦး ဒဏ်ရာရရှိခဲ့တယ်လို့ PDF ခေါင်းဆောင်တဦးက ပြောပါတယ်။