ရန်ကုန်တိုင်းအတွင်း  မတ် ၂၇ ရက် ဖက်ဆစ်တော်လှန်ရေးနေ့က  သာကေတ၊ အင်းစိန်၊ လှိုင်၊ မြောက်ဥက္ကလာ၊ ရွှေပြည်သာ၊ လှိုင်သာယာ၊ တောင်ဒဂုံနဲ့ မြောက်ဒဂုံ မြို့နယ်တွေမှာ  ဗုံး ပေါက်ကွဲမှုတွေ ဖြစ်ပေါ်ခဲ့တယ်လို့ ဒေသခံတွေထံက  သိရပါတယ်။

ရွှေပြည်သာမြို့နယ်၊ နဝရတ်ဈေးနားမှာ  မတ် ၂၇ ရက် ည ၈ နာရီလောက်က  ဗုံးပေါက်ကွဲမှု ဖြစ်ပွားခဲ့တယ်လို့ ဒေသခံတွေက ပြောပါတယ်။

“ည ၈ နာရီလောက်က  နဝရတ်ဈေးနားမှာ  ဗုံးပေါက်တာပါ။ အသံအတော်ကျယ်တယ်။ ဗုံးပေါက်ပြီး  လူနာတင်ကားသံလည်း ကြားတယ်။ ညပေါက်ကွဲတာမို့ သွားမကြည့်ဖြစ်ဘူး။ အထိအခိုက် အတိအကျတော့ မသိပါ” လို့ အနီးနားမှာနေထိုင်သူက ပြောပါတယ်။

အလားတူ  လှိုင်သာယာမြို့နယ်  တပ်ရင်း ၅၃၂ အနီးမှာလည်း  မနေ့ ညနေ ၆ နာရီလောက်က ဗုံးပေါက်ကွဲမှု ဖြစ်ပွားခဲ့ပါတယ်။  

“ပေါက်ကွဲချိန်က ညနေ ၆ နာရီဆိုတော့  လူသွားလူလာရှိနေသေးတယ်။ ဗုံးပေါက်ကွဲမှုကြောင့်  အမျိုးသားတစ်ဦး၊ လမ်းသွားလမ်းလာ အမျိုးသမီးနှစ်ဦး ထိခိုက်သွားတယ်”လို့ ဒေသခံတယောက်က ပြောပါတယ်။ 

မတ် ၂၇ ရက် နေ့လယ် ၃ နာရီလောက်က  သာကေတမြို့နယ် အမှတ် ၉ ရပ်ကွက်အုပ်ချုပ်ရေးမှူးရုံးမှာလည်း ပေါက်ကွဲမှုဖြစ်ပွားခဲ့ကာ ထိခိုက်ဒဏ်ရာရတဲ့ အခြေအနေကို မကြားသိရဘူးလို့ ဒေသခံတွေထံက  သိရပါတယ်။