ပြင်သစ်သမ္မတ အီမန်နျူရယ်မက်ခရွန်က ယူကရိန်းပဋိပက္ခကို ကိုင်တွယ်ရာမှာ စကားလုံးတွေနဲ့ အပြုအမူတွေ ထိန်းထိန်းသိမ်းသိမ်းရှိကြဖို့ ပြောဆိုလိုက်ပါတယ်။ 

အမေရိကန်သမ္မတဂျိုးဘိုင်ဒင်က ရုရှားသမ္မတ ဗလာဒီမာပူတင်ကို သားသတ်သမားလို့ ခေါ်ပြီး အာဏာမှာ ဆက်ရှိနေသင့်တော့ဘူးလို့ ပြောဆိုချက်အပေါ် မက်ခရွန်က သတိပေးလိုက်တာပါ။

France 3 TV channel နဲ့ အင်တာဗျူးမှာ မက်ခရွန်က “ကျနော်ကတော့ ဘိုင်ဒင်ပြောတဲ့ စကားလုံးမျိုးတွေ သုံးနှုန်းမှာမဟုတ်ဘူး၊ ဘာကြောင့်လဲဆိုတော့ ကျနော် သမ္မတပူတင်နဲ့ ဆွေးနွေးမှုတွေ ရှိနေလို့ပါ” လို့ ပြောပါတယ်။

ပိုလန်နိုင်ငံ ဝါဆောမြို့မှာ အမေရိကန်သမ္မတဂျိုးဘိုင်ဒင်က “ပူတင်ဟာ အာဏာဆက်မရှိ နိုင်တော့ဘူး” ဆိုတဲ့ ပြင်းထန်တဲ့ စကားလုံးသုံးခဲ့တာပါ။ 

နောက်မှ အိမ်ဖြူတော်က ဘိုင်ဒင်ရဲ့မှတ်ချက်ဟာ အမေရိကန်အစိုးရ မူဝါဒမဟုတ်သလို ရုရှားအစိုး ရကို အပြောင်းအလဲ လုပ်မှာမဟုတ်ဘူးလို့ ဖြေရှင်းခဲ့ပါတယ်။

မက်ခရွန်က “ကျနော်တို့ရည်ရွယ်ချက်က ယူကရိန်းကို ရုရှားစစ်ရေးတိုက်ခိုက်မှု ရပ်တံ့ဖို့နဲ့ တင်းမာမှုတွေ ဆက်မရှိဖို့ပါ၊ စကားလုံးပြင်းပြင်းထန်ထန်တွေသုံးပြီး တင်းမာမှုတွေ တိုးအောင် မလုပ်သင့်ပါဘူး၊ ပြင်းထန်တဲ့စကားလုံးတွေက မီးထဲကို ဆီလောင်းထည့်တာပါ” လို့ မက်ခရွန်က France 3 TV ကို ပြောပါတယ်။ 

အမေရိကန်နိုင်ငံခြားရေးဝန်ကြီး အန်တိုနီဘလင်ကန်ကတော့ အမေရိကန်အနေနဲ့ ရုရှားအစိုးရကို အပြောင်းအလဲ လုပ်နေတဲ့ မဟာဗျူဟာမျိုး မရှိပါဘူးလို့ သမ္မတဂျိုးဘိုင်ဒင်ရဲ့ ပြောဆိုချက်ကို  ပြန်လည်ဖြေရှင်းပြောဆိုပါတယ်။

အစ္စရေးကို ရောက်ရှိနေတဲ့ ဘလစ်ကန်က “ပြီးခဲ့တဲ့ ညက သမ္မတဘိုင်ဒင်နဲ့ အိမ်ဖြူတော်မှာ အစည်းအဝေး လုပ်ကြပါတယ်။ ရုရှားသမ္မတပူတင်အနေဲ့ ယူကရိန်းကို ဆက်ပြီး စစ်မဆင်နိုင်ဘူးလို့ ပြောတာပါ၊ ဒီထက်မပိုပါဘူး” လို့ သတင်းသမားတွေကို ပြောပါတယ်။