သထုံမြို့နယ်၌ စစ်တပ်က လက်နက်ကြီးဖြင့်ပစ်ခတ်သဖြင့် ဒေသခံ ၄ ဦး ဒဏ်ရာရ
မွန်ပြည်နယ်၊ သထုံမြို့ အခြေစိုက် စစ်ကောင်စီတပ်စခန်းက မတ် ၂၇ ရက် ည ၇ နာရီမှာ လက်နက်ကြီးနဲ့ ပစ်ခတ်တာကြောင့် ဒေသခံ ၄ ဦး ကျည်စ ထိမှန် ဒဏ်ရာရသွားပါတယ်။
သထုံအခြေစိုက် စစ်ကောင်စီတပ်(စကခ ၈) လက်အောက်ခံ ခမရ ၄၀၆ တပ်ရင်းစခန်းကုန်းကနေ လက်နက်ကြီးနဲ့ ပစ်ရာမှာ ပန္နဲတောရွာထဲ ကျည်ကျရောက် ပေါက်ကွဲတာကြောင့် ဦးလှကြည် ၅၇နှစ်၊ နော်ပြား ၃၈ နှစ် ၊ မင်းချစ်သူ ၁၂ နှစ် နဲ့ စောဖားမီး ၅၅ နှစ်တို့ ကျည်စထိမှန်ခဲ့တာပါ။
စောဖားမီးကတော့ ကျည်စထိမှန်တာ အများဆုံးဖြစ်ပြီး သူတို့အားလုံးကို သထုံပြည်သူ့ဆေးရုံကို ပိုဆောင်ထားတယ်လို့ နီးစပ်သူ တစ်ဦးက ဆိုပါတယ်။
ကရင်ပြည်နယ်နဲ့ မွန်ပြည်နယ်စပ်တွေမှာ စစ်ကောင်စီတပ်နဲ့ KNLA ပူးပေါင်းတပ်တို့ကြား နေစဉ် တိုက်ပွဲဖြစ်ပွားနေပြီး စစ်ကောင်စီတပ်ဖွဲ့ဝင်တွေဘက်က သေဆုံးဒဏ်ရာရတာတွေ ပိုများနေတာကြောင့် လေကြောင်းပစ်ကူတွေလည်း ရှိနေတယ်လို့ တိုက်ပွဲဆင်နွှဲနေတဲ့ KNLA တာဝန်ရှိသူက ပြောပါတယ်။
