ထိုင်းမြောက်ပိုင်း၊ ချင်းရိုင်းခရိုင်၊ မယ်ဆိုင်မြို့ကနေ မြန်ဘက်ဘက်ခြမ်း တာချီလိတ်ကို ပို့ပေးခဲ့တဲ့ မူးယစ်ဆေးဝါးရောင်းဝယ်မှုရရှိငွေပေါင်းမှာ တစ်နှစ်အတွင်း ဘတ်သန်းပေါင်း ၅၀၀ ကျော်တယ်လို့ ချင်းရိုင်းခရိုင် မူးယစ်ဆေးဝါးနှိမ်နင်းရေး ရဲတပ်ဖွဲ့က  ဧပြီလ ၁ ရက်  ဒီနေ့သတင်းစာရှင်းပွဲမှာ ပြောပါတယ်။ 

ချင်းရိုင်းခရိုင် မူးယစ်နှိမ်နင်းရေးရဲတပ်ဖွဲ့၊ နယ်မြေခံရဲ၊ စစ်တပ်နဲ့ အုပ်ချုပ်ရေးပိုင်းက တာဝန်ရှိသူတွေပါတဲ့ ပူးပေါင်းအဖွဲ့ဟာ စီမံချက်အရ ဒီကနေ့မနက်မှာ မယ်ဆိုင်မြို့ထဲရှိ မူးယစ်ဆေးဝါးနဲ့ ဆက်နွှယ်နေတဲ့ နေရာကို  ၅ နေရာကို သွားရောက်စစ်ဆေးခဲ့တယ်လို့ ဆိုပါတယ်။ 

စစ်ဆေးချက်အရ ဝိန်းဖန်းရပ်ကွက်ရှိ ကုန်ပစ္စည်းပို့ဆောင်ရေးလုပ်ငန်းဆောင်ရွက်နေတဲ့ ပုဂ္ဂလိကကုမ္ပဏီတစ်ခုဟာ မူးယစ်ဆေးဝါးကုန်သည်တွေ ငွေသားတွေကို ထိုင်းဘက်ကနေ တာချီ လိတ်ကို ပို့ဆောင်ပေးနေတာ သိရှိပြီး နောက်ကြောင်းပြန် စစ်ဆေးချက်အရ ၁ နှစ်အတွင်း ဘတ်သန်းပေါင်း ၅၀၀ ကျော် ပို့ပေးခဲ့တယ်လို့ ဆိုပါတယ်။

အဆိုပါငွေတွေကို ဘဏ်စာရင်းအငှါးဖွင့်ပေးသူ အမည်တွေနဲ့ပါ လွှဲပြောင်းခဲ့သလို ပစ္စည်းတွေဝယ်ယူပြီး ငွေမည်းကို ငွေဖြူအဖြစ် လုပ်ခဲ့တာတွေရှိကြောင်း ၊ ငွေသားသက်သက်မှာ ပို့ခအနေနဲ့ ဘတ်ငွေ ၁ သန်းကို ဝန်ဆောင်ခ ဘတ် ၃၀၀၀ ရခဲ့တယ်လို့ ကုမ္ပဏီက ဖွင့်ဟဝန်ခံထားပါတယ်။ 

ဒါ့အပြင် မနှစ် ဒီဇင်ဘာ ၁၀ ရက်က ချင်းရိုင်းမြို့ မီးပွိုင့်အနီး ကား ၁ စီးပေါ်မှာ စိတ်ကြွဆေးပြား ၁၂၀၀၀၀၀ ( တစ်သန်းကျော် ) ဖမ်းမိခဲ့တာနဲ့ပတ်သက်ပြီး ကွင်းဆက်တွေကို ဆက်လက်စုံစမ်းစစ်ဆေးချက်အရ ချင်းရိုင်းမြို့ မဲ့ယောင်းရပ်ကွက်ရှိ  အိမ်ဝင်းထဲက ဂိုဒေါင်တစ်လုံးကို ဝင်ရောက်စစ်ဆေးရာမှာ  ခုတင်အောက်မှာ အနက် ၃ မီတာတွင်းလုပ်ထားပြီး  မူးယစ်ဆေး ဝါးသိုလှောင်ရာအဖြစ်အသုံးပြုခဲ့တယ်လို့ ဆိုပါတယ်။

မူးယစ်မှောင်ခိုသမားတွေဟာ  မူးယစ်ဆေးတွေကို မြန်မာနယ်စပ်ကသယ်လာပြီး ထိုင်းနိုင်ငံအတွင်းပိုင်းသို့ မဖြန့်ဖြူးခင် အဆိုပါနေရာမှာ သိုလှောင်ထားတယ်လို့ ဆိုပါတယ် ။

ဒါ့အပြင် တာဝန်ရှိသူတွေဟာ ချင်းမိုင် ၊ ချင်းရိုင်း၊ ဖရဲ့ ၊ နန့် ၊ တာ့ခ် ၊ ဖစ်ချဘွန်း၊ ဥထိုင်းဌာနီ၊ ချွန်းပူးရီး၊ နောင်ခိုင်၊ ဥဒွန်းဌာနီ၊ စကွန်းနခွန်း စတဲ့ခရိုင်ရှိ  နေရာပေါင်း ၅၇ နေရာမှာ မူးယစ်ဆေး ဝါးစစ်ဆင်ရေးစီမံချက်ဆောင်ရွက်ခဲ့ပြီး တရားခံ ၁၁ ဦးနဲ့ မူးယစ်ဆေးနဲ့ ပတ်သက်နေတဲ့ ဘတ်သန်းပေါင်း ၂၂၀ ကျော်ရှိ  ငွေသား ၊ ဘဏ်စာအုပ် ၊ တိုက်တာ၊ ခြံမြေ စတဲ့ ပိုင်ဆိုင်မှုတွေကို သိမ်းဆည်းခဲ့တယ်လို့ သတင်းမှာ ဖော်ပြပါတယ်။ 

ကိုးကား- Maesai Press