မန်ယူနိုက်တက်အသင်းအနေနဲ့ ရာသီကုန်ချိန်မှာ အဆင့် လေးအတွင်း ဝင်နိုင်ဖို့အတွက် အခွင့်အရေး ရှိနေသေးတယ်လို့ နည်းပြ ရန်းနစ်ခ်က ပြောပါတယ်။ 

မန်ယူအသင်းဟာ မနေ့ညက  ကစားခဲ့တဲ့ လက်စတာနဲ့ပွဲစဉ်မှာ ဂိုးမရှိသရေရလဒ်သာ ကစားနိုင်ခဲ့ပြီး ဥရောပချန်ပီယံလိဂ် ဝင်ခွင့်ရဖို့ အတွက်ရုန်းကန်ရတော့မှာပါ။ 

နည်းပြ ရန်းနစ်ခ်ကတော့  အဆင့်လေးအတွင်းဝင်ဖို့က သင်္ချာနည်းအရ ဖြစ်နိုင်ပြီး ကိုယ့်အလုပ်ကို အကောင်းဆုံးလုပ်ပြီး ရှေ့ဆက်သွားဖို့သာရှိကြောင်း ပြောပါတယ်။  

“ထိပ်ဆုံး ၄ သင်းစာရင်းဝင်ဖို့က သင်္ချာနည်းအရဘာမဆိုဖြစ်နိုင်ပါသေးတယ်။ ရာသီကုန်ဆုံးချိန်မှာ ဖြစ်နိုင်သမျှ အကောင်းဆုံးအဆင့်ရပ်တည်မှုတခုရလာဖို့က ကျနော်တို့ရဲ့အလုပ်ပါပဲ”  လို့ ရန်းနစ်ခ်ကပြောပါတယ်။ 

မန်ယူအသင်းဟာ ပွဲစဉ် ၃၀ ကစားအပြီးမှာ ၁၄ ပွဲနိုင် ၉ ပွဲသရေ၊ ၇ ပွဲရှုံးနိမ့်ခဲ့ပြီးလက်ကျန် ၈ ပွဲအလို အဆင့် ၆ နေရာမှာ ရပ်တည်နေပါတယ်။ 

ဒါပေမယ့် အဆင့် ၅ နေရာက စပါးအသင်းထက် တပွဲပိုကစားထားသလို အဆင့် ၄ နေရာက အာဆင်နယ်ထက်လည်း ၃ မှတ်ကွာဟနေပါတယ်။