စစ်ကိုင်းတိုင်းအတွင်း မြို့နယ် ၃ ခုမှာ ဧပြီ ၇ ရက်နေ့က စစ်ကောင်စီတပ်ဖွဲ့တွေ မိုင်းဆွဲတိုက်ခိုက်ခံခဲ့ရတယ်လို့ ဒေသခံတွေက ပြောပါတယ်။

ပုလဲမြို့နယ် အထွေထွေအုပ်ချုပ်ရေးဦးစီးဌာနရုံးအတွင်းမှာ ဧပြီ ၇ ရက်နေ့ မွန်းတည့် ၁၂ နာရီလောက် မိုင်းပေါက်ကွဲခဲ့တယ်လို့ ဒေသခံတွေက ပြောပါတယ်။

“ဒီကောင်တွေ ပြည်သူ့ကာကွယ်ရေးအဖွဲ့တွေဆီကနေ သိမ်းလို့ရတဲ့မိုင်းတွေ ဖျက်ဆီးပစ်ဖို့ နေရာရွေ့တဲ့သဘော လုပ်တာကနေ အခုလိုပေါက်ကွဲတာဖြစ်တာ။ သေတာကတော့ အရာရှိ ၁ ဦး သေတယ်၊ တပ်သားအဆင့် သေတယ်။ အခြားတပ်သား ၁  ဦး ခြေထောက်ဖြတ်ရမယ့် အခြေအနေရှိတယ်။ နောက်ပြီး ကားသာမား ၁ ဦး လက်ထိမှန်ဒဏ်ရာရရှိတာတွေ ရှိနေတယ်” လို့ ပုလဲမြို့ခံတဦးက  ပြောပါတယ်။

အခုပေါက်ကွဲခဲ့တဲ့ ပုလဲထွေအုပ်ရုံးဟာ ပြီးခဲ့တဲ့ မတ်လတုန်းကလည်း ပြည်သူ့ကာကွယ်ရေးအဖွဲ့တွေ ပစ်ခတ်တာကြောင့် ရုံးအဆောက်ဦ ထိခိုက်ပျက်စီးတာတွေရှိခဲ့တယ်လို့ ဒေသခံတွေက ပြောပါတယ်။

စစ်ကိုင်းတိုင်း ချောင်းဦးဘက်မှ မုံရွာ-မန္တလေး ကားလမ်းကြီးဘက် ထွက်လာတဲ့ စစ်ကောင်စီယာဉ်ကိုလည်း ဧပြီ ၇ ရက်နေ့ မနက်အစောပိုင်း ၂ ခွဲလောက်မှာ မိုင်းဆွဲတိုက်ခိုက်ခဲ့ကြတယ်လို့ အမျိုးသမီးစစ်သည်တော်တပ်ရင်း (မြောင်) M2W ရဲ့ တာဝန်ရှိသူဆီက သိရပါတယ်။

မုံရွာ-မန္တလေးသွားကားလမ်းနတ်ရေကန်နဲ့ ငါးယှန် အကြားမှာ မိုင်းဆွဲခဲ့ရတာလို့ သိရပါတယ်။

မြောင်အမျိုးသမီးစစ်သည်တော်မဟူရာခင်က “ဒီနေ့ဆွဲခဲ့တဲ့မိုင်းက ကျမတို့ အမျိုးသမီးစစ်သည်တော်တပ်ရင်း (မြောင်) M2W က ထုတ်လုပ်တဲ့ ပဒေသာမိုင်းနဲ့ သင်္ကြန်ကြို လက်ဆောင်ပေးခဲ့တာပါ။ ကားနှစ်စီးပျက်စီးတယ်။ အဲတာက မျက်စိနဲ့တပ်အပ်မြင်ခဲ့ရတာ။ ကျန်တာကတော့ အသေးစိတ် စုံစမ်းနေဆဲပါပဲ” လို့ အတည်ပြုပြောဆိုပါတယ်။

မိုင်းဆွဲတိုက်ခိုက်မှုကို မြောင်မြို့နယ် ပြည်သူ့ကာကွယ်ရေး နဲ့ လုံခြုံရေးအဖွဲ့-CDSOM၊Myaung Union Army၊ စစ်ကိုင်းခရိုင်တပ်ရင်း-၂ တပ်ခွဲ (၁) တို့ ပူးပေါင်းတိုက်ခိုက်ခဲ့တာလို့ သိရပါတယ်။

စစ်ကိုင်းမြို့နယ် အုန်းတောရွာ အနောက်ဘက်မှာလည်း မုံရွာ ဘက်ကနေ စစ်ကိုင်းဘက်ကို မောင်းနှင်လာတဲ့ စစ်ကောင်စီယာဉ်တန်း ဧပြီ ၇ ရက် မွန်းလွဲ ၂ နာရီကျော်က မိုင်းဆွဲတိုက်ခိုက်ခံခဲ့ရပါတယ်။

စစ်ကောင်စီတပ်ကား ၈ စီးကို ရှေ့ထွက်မိုင်း ၁၂ လုံးနဲ့ တိုက်ခိုက်ခဲ့တာဖြစ်ပြီး အာဏာရှင်စနစ်တိုက်ဖျက်ရေးပြည်သူ့တပ်ဖွဲ့ (PAFD) က လုပ်ဆောင်တာလို့ သိရပါတယ်။

“သူတို့အလာမှာ သေချာချိန်ဆွဲလိုက်တာ။ ကားတွေပေါ် ပါတဲ့ သူအများကြီးတောင် တစ်ယောက်ပဲ ပြန်ပစ်နိုင်တော့တာ။ သေဆုံး ဒဏ်ရာရတာ ရှိနိုင်တယ်” လို့ PAFD တပ်ဖွဲ့ဝင်တဦးက ပြောပါတယ်။

မတ် ၁၁ ရက်နေ့ကလည်း မုံရွေ-မြင်းမူ ဘက်ကနေ စစ်ကိုင်းကို မောင်းနှင်လာတဲ့ စစ်ကောင်စီတပ် ယာဉ်တန်းကို PAFD က မိုင်းဆွဲတိုက်ခိုက်ခဲ့ပါတယ်။

စစ်ကိုင်းတိုင်း ပုလဲမြို့နယ်နဲ့ မြောင်မြို့နယ်နဲ့ စစ်ကိုင်းမြို့တို့မှာ တပ်ဖွဲ့ဝင်တွေ တိုက်ခိုက်ခံရတာနဲ့ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။