အနောက်နိုင်ငံတွေဟာ ရုရှားနိုင်ငံအပေါ် ချမှတ်ထားတဲ့ စီးပွားရေး ပိတ်ဆို့မှုဒဏ်ကို သူတို့ ဘာသာ ပြန်ခံနေရတယ်လို့ ရုရှားသမ္မတ ဗလာဒီမာပူတင်က ဧပြီ ၁၈ ရက်နေ့မှာ ပြောပါတယ်။ 

ဒါကို ပူတင်က အနောက်နိုင်ငံတွေဟာ ကိုယ့်ဂိုးကို ကိုယ်ပြန်သွင်းမိနေတယ်လို့ သုံးနှုန်း ပြောဆိုသွားပါတယ်။ 

ယူကရိန်းအရေးနဲ့ ပတ်သက်လို့ အနောက်နိုင်ငံတွေက ရုရှားအပေါ် စီးပွားရေးပိတ်ဆို့လိုက်တဲ့ အကျိုးဆက်ကြောင့် အနောက်နိုင်ငံတွေမှာ စီးပွားရေး ယိုယွင်းမှုကို ဦးတည်သွားနေတယ်လို့ ပြောပါတယ်။ 

ဖေဖော်ဝါရီလနှောင်းပိုင်းမှာ ရုရှားက ယူကရိန်းကို ကျူးကျော်တဲ့နောက်ပိုင်း အနောက်နိုင်ငံတွေ ဟာ ရုရှားနိင်ငံအပေါ် အရင်က မချမှတ်ခဲ့ဖူးတဲ့ စီးပွားရေးနဲ့ ဘဏ္ဍာရေး ဒဏ်ခတ်ပိတ်ဆို့မှုတွေကို ချမှတ်ထားတဲ့အတွက် ရုရှားစီးပွားရေး အထိနာနေတာပါ။

 ဒါပေမယ့် ပူတင်က ရုရှားရဲ့ ပြည်တွင်း စီးပွားရေး အခြေအနေတွေကို ပြောကြားတဲ့အခါမှာတော့ ငွေကြေးဖောင်းပွမှုဟာ ပုံမှန်အတိုင်းရှိနေပြီး အရောင်းအဝယ်ဈေးကွက်ကလည်း တည်ငြိမ်နေ တယ်လို့ ဆိုသွားပါတယ်။ 

အစိုးရထိပ်တန်းအရာရှိတွေပါဝင်တဲ့ အစည်းအဝေးမှာ ပူတင်က အခြေအနေသစ်အောက်မှာ ရုရှားအနေနဲ့ နိုင်ငံကုန်သွယ်မှုမှာ ရုရှားငွေကြေးကိုပဲ အသုံးပြုနိုင်ရေးအတွက် အရှိန်မြှင့်လုပ်ဆောင်ဖို့ လိုအပ်တယ်လို့ ပြောသွားပါတယ်။