close

မန္တလေး အမှတ် ၂ ရဲစခန်းရှေ့ ‘သေမှာကြောက်နေလား’ ဆိုပြီး အော်သည့် လူငယ်အချို့ ပစ်ခတ် ဖမ်းဆီးခံရ

မန္တလေးမြို့ အောင်မြေသာစံမြို့နယ် ၇၆ လမ်း၊ ၄ လမ်း နဲ့ ၅ လမ်း ကြားရှိ အမှတ် (၂) ရဲစခန်းရှေ့မှာ ဧပြီ ၂၂ ရက် ည ၉ နာရီခွဲက သေမှာကြောက်နေလားဆိုပြီး အော်တဲ့ လူငယ်တချို့ ပစ်ခတ်ဖမ်းဆီးခံခဲ့ရပါတယ်။

လူငယ် ၄ ဦးဟာ အမှတ် ၂ ရဲစခန်းရှေ့မှာ “ ငါ-ိုးမသားတွေ မင်းတို့ရဲတွေ သေမှာကြောက်နေလား၊ မင်းတို့ကြောက်နေလို့ အတားအဆီးတွေ ပိတ်ထားတာလား၊ သတ္တိရှိရင်ထွက်ခဲ့” အော်ဟစ်ပြီး ဆိုင်ကယ်နဲ့ မောင်းပြေးရာ စစ်ကောင်စီ လက်နက်ကိုင်တွေက သေနတ်နဲ့ လိုက်လံပစ်ခတ်ခဲ့တာလို့ ဒေသခံတွေကပြောပါတယ်။

မြောက်ပြင်ရပ်မှာ နေထိုင်သူတဦးက “ညက အမှတ် ၂ စခန်းရှေ့မှာ ပစ်တာ။ အဲ့ဒီကနေ ၁ လမ်းဘက်ထိ လိုက်ပစ်တာ ကြားရတယ်။ မနက်ကျတော့ အဲ့ဒီလူငယ်တွေ ဖမ်းခံလိုက်ရတယ်လို့တော့ ကြားတယ်။ တယောက်လည်း သေနတ်မှန်တယ်ပြောကြတယ်။” လို့ ဆိုပါတယ်။

သေနတ်မှန်သူမှာ အသက် ၁၇ နှစ်အရွယ် ရဝေအောင်  ဆိုသူဖြစ်ပြီး ပေါင်မှာ ကျည်ဖောက်ဝင် ဒဏ်ရာရတာကြောင့် ပရဟိတ အသင်းတခုက သယ်ဆောင်လာစဉ်မှာ ဖမ်းဆီးခံခဲ့ရတာဖြစ်ပါတယ်။

အဲ့ဒီနောက် အသက် ၁၉ နှစ်အရွယ် ဇင်ကို၊ အသက် ၁၉ နှစ်အရွယ် ချမ်းအေးတို့ကို ထပ်မံဖမ်းဆီးရမိခဲ့ပြီး တဦးမှာ လွတ်မြောက်နေတယ်လို့ သိရပါတယ်။ ပစ်ခတ်ဖမ်းဆီးခံရတဲ့ လူငယ်တွေကို စစ်ကောင်စီက ဘယ်မှာ ထိန်းသိမ်းထားတယ်ဆိုတာ မသိရသေးပါဘူး။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate
Up