မကွေးတိုင်း ပေါက်မြို့နယ်မှာ ဧပြီ ၂၂ ရက်နဲ့ ၂၃ ရက်နေ့တွေက စစ်ကောင်စီတပ် မိုင်းဆွဲတိုက်ခိုက်ခံရပြီး ပြည်သူတွေရဲ့ နေအိမ်တွေ၊ ကွမ်းခြံ (ကွမ်းရွက်စိုက်ခင်း) တွေကို မီးရှို့ ဖျက်ဆီးခဲ့ကြတယ်လို့ ပေါက် PDF တပ်ရင်း ၄ နဲ့ ဒေသခံပြည်သူတွေဆီက သိရပါတယ်။

ပေါက်မြို့နယ် ကျောင်းကုန်းရွာနဲ့ ကျွန်းကြီးကြားမှာ စစ်ကောင်စီတပ်သားတွေကို ပေါက် PDF တပ်ရင်း ၄ နဲ့ King Fighter က  မိုင်း ၂ လုံးဆွဲပြီး အပြန်အလှန်တိုက်ပွဲဖြစ်ပွားရာ ဖောကား ၁ စီး ထိခိုက်ပျက်စီးသွားကာ စစ်ကောင်စီဘက်က ထိခိုက်သေဆုံးသူ ရှိနိုင်တယ်လို့ ပေါက် PDF တပ်ရင်း ၄ ရဲ့ တာဝန်ခံ ဗိုလ်ငသွေးက ဒီဗွီဘီကို ပြောပါတယ်။

“ကျောင်းကုန်းရွာနားမှာ ဧပြီ ၂၃ ရက်နေ့မနက်ပိုင်းမှာလည်း စစ်ကောင်စီတပ်တွေ မိုင်းကွင်းထဲ ဝင်လာလို့ မိုင်း ၂ လုံး ထပ်ခွဲပြီး တိုက်ခိုက်ခဲ့တယ်ဗျ။ မိုင်းခွဲပြီးတော့ နှစ်ဘက်ထိတွေ့တိုက်ပွဲဖြစ်ပွားကာ နေ့လယ်ပိုင်းလောက်မှာ လက်နက်အင်အား၊ လူအင်အား မမျှတာကြောင့် ကျနော်တို့ ဘက်က ရဲဘော်တွေ အထိခိုက်အကျဆုံးမရှိဘဲ ဆုတ်ခွာခဲ့ကြတယ်။” 

အဲဒီနောက်ပိုင်းမှာ စစ်ကောင်စီဘက်က လက်နက်ကြီး လက်နက်ငယ်တွေနဲ့ ဆက်တိုက်ပစ်ခတ်ပြီး ကျွန်းကြီးရွာထဲကို ဝင်မီးရှို့လို့ ကာကွယ်ရေးတပ်ဖွဲ့တွေနဲ့ ပြည်သူတွေ ဝိုင်းဝန်းငြှိမ်းသတ်ခဲ့ပေမယ့် နေအိမ် ၃၀ လောက် မီးလောင်ကျွမ်းခဲ့တယ်လို့ ပြောပါတယ်။

ရေကျော်ကျေးရွာကိုလည်း ဧပြီ ၂၃ ရက်နေ့ မွန်းတည့် ၁၂ နာရီလောက်မှာ ကျွန်းကြီးရွာဘက်ကနေ စစ်ကောင်စီတပ်တွေ ဝင်ရောက်လာပြီး ရွာမြောက်ပိုင်းမှာကျန်ရှိနေတဲ့ ပြည်သူတွေရဲ့ နေအိမ်တွေကို တတိယအကြိမ် ထမ်မံပြီးမီးရှို့ဖျက်ဆီးကာ ပြည်သူတွေစိုက်ပျိုးထားတဲ့ ကွမ်းခြံတွေကိုလည်း မီးရှို့ဖျက်ဆီးသွားကြတယ်လို့ ရေကျော်ကျေးရွာဒေသခံ အမျိုးသမီး တယောက်က ပြောပါတယ်။

“ရွာထဲကို အခုမှပြန်ဝင်ကြည့်ပြီး မီးတွေငြှိမ်းနေကြရတာ။ နေအိမ် ၃၅ လုံးလောက်မီးလောင်ဆုံးရှုံးကာ ကွမ်းခြံတွေလည်း အများအပြား မီးလောင်ဆုံးရှုံးခဲ့ရတယ်။ ဒေသခံတွေအနေနဲ့ ကွမ်းခြံတခြံ စိုက်ပျိုးမယ်ဆိုရင် ငွေ ၁၅ သိန်းကျပ်လောက် ရင်းနှီးမြှုပ်နှံကြရတယ်။”

စစ်ကောင်စီတပ်တွေ မကြာခဏ ဝင်ရောက် အကြမ်းဖက်မီးရှို့တာကြောင့် ကိုယ်ဝန်ဆောင်အမျိုးသမီးတွေ၊ သက်ကြီးရွယ်အိုတွေ၊ ကလေးသူငယ်တွေနဲ့ ရွာသူရွာသား အားလုံး ရွာထဲမှာ မနေရဲကြတော့ဘဲ မကြာခဏ ဘေးလွတ်ရာ ထွက်ပြေးနေကြရတယ်လို့ ဆိုပါတယ်။

“စစ်ကောင်စီတပ်တွေက ကျမတို့ပြည်သူလူထုကို ဘာမှစားစရာမရှိအောင်၊ နေစရာအိမ်မရှိအောင်၊ ငတ်သေအောင် စုထားတဲ့ ဆန်စပါးကအစ အကုန်မီးရှို့ ဖျက်ဆီးသွားကြတာ” လို့ ရေကျော်ကျေးရွာဒေသခံ အမျိုးသမီးက ပြောပါတယ်။

ကွမ်းခြံ (ကွမ်းရွက်စိုက်ခင်း) တွေကို မီးရှို့ဖျက်ဆီးတာဟာ ပြည်သူလူထုရဲ့ စားဝတ်နေရေး ဒေါက်တိုင်တွေကို ရည်ရွယ်ချက်ရှိရှိ ဖျက်ဆီးတာဖြစ်သလို ရွာတွေမှာရှိတဲ့ စားနပ်ရိက္ခာတွေကိုလည်း စစ်ကောင်စီတပ်တွေက အဓမ္မယူဆောင်သွားကြတယ်လို့ ရွာသားတွေက ပြောပါတယ်။

ရေကျော်ရွာသားတယောက်က “မနေ့က တုန်းက ရေကျော်ရွာကိုဝင်ရောက်မီးရှို့ပြီး ဘုန်ကြီးကျောင်းမှာထားတဲ့ ပြည်သူတွေရဲ့ စာနပ်ရိက္ခာ ဆန်တွေကို စစ်ကောင်စီတပ်တွေက ကား ၄ စီးနဲ့ တင်ယူဆောင်သွားကြသလို ရွာမြောက်ပိုင်းမှာကျန်ခဲ့တဲ့ နေအိမ်တွေကိုပါ ထပ်ပြီးမီးရှို့ဖျက်ဆီးနေကြတယ်” လို့ ပြောပါတယ်။

ကျောင်းကုန်းရွာကိုလည်း ညနေ ၅ နာရီကျော်လောက်ကတည်းက စစ်ကောင်စီတပ်တွေ ဝင်လာပြီး ပြည်သူတွေစိုက်ပျိုးထားတဲ့ ကွမ်းခြံ ၄ ခြံကို မီးရှို့ဖျက်ဆီးခဲ့တယ်လို့ ကျောင်းကုန်းရွာဒေသခံတယောက်က ပြောပါတယ်။

ကျောင်းကုန်းရွာ ကွမ်းခြံမီးရှို့ခံရတာကြောင့် ကျပ်သိန်း ၁၂၀ ဖိုးလောက်ဆုံးရှုံးခဲ့တဲ့အပြင် ရေကျော်ရွာ၊ ကျွန်းကြီးရွာက ကွမ်းခြံတွေ အားလုံးစစ်ကောင်စီတပ်တွေက မီးရှို့ဖျက်ဆီး သွားကြတယ်လို့ ဆိုပါတယ်။

စစ်ကောင်စီတပ်တွေက ပထမတကြိမ် ကျောင်းကုန်းရွာကို မီးရှို့တဲ့အချိန်မှာ အိမ်ခြေ ၈၀ လောက်မီးလောင်ဆုံးရှုံးခဲ့သလို ဒုတိယတကြိမ်ထပ်ဝင်လာပြီး ကွမ်းခြံတွေကို မီးရှိ့ဖျက်ဆီးသွားကြတာလို့ ကျောင်းကုန်းရွာဒေသခံက ပြောပါတယ်။

ပေါက်မြို့နယ်ထဲမှာ ဧပြီ ၇ ရက်နေ့ကစလို့ စစ်ကောင်စီတပ်တွေက ကျေးရွာ ၂၀ လောက်ကို ဆက်တိုက်ဝင်ရောက်မီးရှို့ပြီး အကြမ်းဖက်နေတာကြောင့် ဒေသခံပြည်သူ ၂၀၀၀၀ လောက် ဘေးလွတ်ရာကို ထွက်ပြေးပုန်းတောင်နေရသလို အမိုးအကာ၊ စားနပ်ရိက္ခာနဲ့ ဆေးဝါးတွေ အရေးပေါ်အကူညီလိုအပ်နေတယ်လို့ သိရပါတယ်။