လာမယ့်ဘောလုံးရာသီမှာ ပရီးမီးယားလိဂ်က အသင်း ၉ သင်းအထိ ဥရောပပြိုင်ပွဲတွေမှာ ပါဝင်ယှဉ်ပြိုင်ခွင့်ရဖို့ မျှော်လင့်ချက် ရှိနေပါတယ်။

ပုံမှန်အားဖြင့်ဆိုရင်တော့ ပရီးမီးယားလိဂ်က အသင်း ၇ သင်းကပဲ ဥရောပပြိုင်ပွဲတွေမှာ ပါဝင်ယှဉ်ပြိုင်ကစားခွင့် ရှိတာပါ။

လာမယ့်ရာသီမှာ ၉ သင်းအထိ ပါဝင်ယှဉ်ပြိုင်ခွင့်ရဖို့ ဆိုရင်တော့ ဝက်စ်ဟမ်းနဲ့ လက်စတာအသင်းတွေရဲ့ ရလဒ်ပိုင်းက အဆုံးအဖြတ် ဖြစ်ပါတယ်။

ဝက်စ်ဟမ်းအသင်းက ယူရိုပါလိဂ် ဆီမီးဖိုင်နယ်မှာ ဖရန့်ဖတ်နဲ့ တွေ့ဆုံနေပြီး ချန်ပီယံ ဖြစ်ခဲ့မယ်ဆိုရင် ချန်ပီယံလိဂ်ပြိုင်ပွဲကို ဝင်ရောက်ယှဉ်ပြိုင်ခွင့် ရမှာပါ။

အလားတူ လက်စတာအသင်းဟာလည်း ယူရိုကွန်းဖရန့်လိဂ် ဆီမီးဖိုင်နယ်ကို တက်ရောက်ထားပြီး ချန်ပီယံဖြစ်ခဲ့ရင် ယူရိုပါလိဂ်ပြိုင်ပွဲ ကစားခွင့်ရမှာပါ။

ပရီးမီးယားလိဂ်မှာ ထိပ်ဆုံးလေးသင်းက ချန်ပီယံလိဂ်ဝင်ခွင့်ရပြီး အဆင့် ၅ နဲ့ အက်ဖ်အေဖလားချန်ပီယံ အသင်းတွေက ယူရိုပါလိဂ်ဝင်ခွင့်နဲ့ လိဂ်ဖလား ချန်ပီယံအသင်းက ကွန်းဖရန့်လိဂ် ဝင်ခွင့်ရပါတယ်။

ဒါပေမဲ့ လိဂ်ဖလားကို အဆင့်လေးအတွင်းက လီဗာပူးရရှိထားပြီး အက်ဖ်အေဖလား ဗိုလ်လုပွဲကိုလည်း အဆင့်လေးအတွင်းက ချဲလ်ဆီးနဲ့ လီဗာပူးတို့ တက်ရောက်ထားတာပါ။ ဒါကြောင့် အမှတ်ပေးဇယားမှာ အဆင့် ၆ ရတဲ့အသင်းက ယူရိုပါလိဂ်ဝင်ခွင့်၊ အဆင့် ၇ ရတဲ့ အသင်းက ကွန်းဖရန့်လိဂ် ကစားခွင့်ရမှာပါ။

ပရီးမီးယားလိဂ်က ၉ သင်းအထိ ဥရောပဝင်ခွင့်ရဖို့ဆိုရင် ဝက်စ်ဟမ်းနဲ့ လက်စတာအသင်းတွေက အဆင့် ၇ အတွင်း မဝင်ဖို့ လိုအပ်သလို ယူရိုပါလိဂ်နဲ့ ကွန်းဖရန့်လိဂ်တွေမှာ ချန်ပီယံဖြစ်ဖို့ လိုအပ်ပြီး ဆီမီးဖိုင်နယ်အဆင့်အထိ တက်ရောက်ထားလို့ ဆက်ပြီး စောင့်ကြည့်သွားရမှာ ဖြစ်ပါတယ်။