ရှမ်းပြည်မြောက်ပိုင်း၊ ကျောက်မဲမြို့နယ်၊ ပန်လင်ကျေးရွာမှ မေ ၅ ရက် က တောထဲ မြင်းသွားရှာတဲ့ကလေး   နှစ်ယောက်  မိုင်းနင်းမိပြီး ဆေးရုံတင်ထားရပါတယ်။ 

အဆိုပါကလေး နှစ်ယောက်ဟာ  ပန်လင်ရွာက အသက် ၁၃ နှစ်အရွယ်  မိုင်းကျော်ရန်နဲ့ အသက် ၆ နှစ်သား မိုင်းမင်းဟန်ဦးတို့ဖြစ်ပြီး  သူတို့ရဲ့ ဒူးခေါင်း၊ ပေါင်၊ ခြေသလုံးနဲ့  ဝမ်းဗိုက်တွေမှာ ဒဏ်ရာပြင်းတဲ့အတွက် ကျောက်မဲဆေးရုံကနေ လားရှိုးဆေးရုံကို လွှဲပေးလိုက်ပြီလို့  အိုမ်တမာဝ် လူမှုကူညီရေးအသင်းမှ  မိုင်းရဲဝင်းအောင်က ပြောပါတယ်။

“သူတို့ရွာကတော့ ကျောက်မဲနဲ့ မိုင် ၂၀ လောက်ဝေးတယ်ခင်ဗျ။ ကျနော်တို့ဆီ အကြောင်း ကြားလာတာက ၁၁ နာရီထိုးခါနီးလောက်ပေါ့။ အိမ်ကမြင်းပျောက်သွားလို့  ရွာပြင်ဘက် လိုက်ရှာရင်း မိုင်းနင်းမိတာတဲ့။ ဒဏ်ရာရတဲ့နေရာတွေက နှစ်ယောက်လုံးတူတယ်။ ဒါပေမဲ့ ၆ နှစ်ရွယ်ကလေးက ပိုဆိုးတယ်။ သွေးထွက်များတော့ လမ်းမှာ အောက်စီဂျင်ပေးပြီး ခေါ်လာရတယ်။ ပထမကျောက်မဲဆေးရုံပို့ပေးပါတယ်။ အခုတော့ ကျောက်မဲကနေ လားရှိုးဆေးရုံကိုလွှဲ ပေးလိုက်ပြီခင်ဗျ။”

ကလေးမိဘတွေဟာ လက်ဖက်ခြံလုပ်ငန်းကိုသာလုပ်ကိုင်တာကြောင့် ငွေကြေမချောင်လည်ဘဲ ကလေး နှစ်ယောက်ခုလိုဖြစ်သွားတော့ ဆေးဖိုးဝါးခအကူအညီလိုအပ်နေပြီး လောလောဆယ်  တအာင်းအမျိုးသမီးအဖွဲ့က ကျပ် ၅ သိန်း ကူညီထားပါတယ်။ 

မိုင်းနင်းမိတဲ့ကလေးတွေအတွက် ကူညီပေးလိုသူတွေအနေနဲ့  အိုမ်တမာဝ် လူမှုကူညီရေးအသင်း ၀၉၄၄၅၀၁၆၇၆၁ / ၀၉၄၅၆၉၈၉၂၁၉ နဲ့ ၀၉၄၀၃၇၀၄၄၆၆ ကို ဆက်သွယ်ကူညီနိုင်ပါတယ်။ 

ကျောက်မဲမြို့နယ်ထဲမှာ ပြီးခဲ့တဲ့နှစ်က  TNLA တအာင်းတပ်မတော် ၊ SSPP  တို့ပါဝင်တဲ့ ပူးပေါင်းတပ်ဖွဲ့တွေနဲ့   RCSS တပ်တွေတိုက်ပွဲတွေပြင်းထန်ဖြစ်ပွားခဲ့တာပါ။

ဒီနှစ်ထဲမှာ တိုက်ပွဲငြိမ်သွားပေမဲ့ တိုက်ပွဲဖြစ်ခဲ့တဲ့ နေရာတဝိုက်မှာ ရွာသားတွေ မကြာခဏမိုင်းနင်းမိကြပြီး   စုစုပေါင်း ၁၃ ကြိမ်လောက်ရှိသွားပြီလို့ အိုမ်တမောဝ်အဖွဲ့က ပြောပါတယ်။