ဖင်လန်နဲ့ဆွီဒင်နိုင်ငံတွေ နေတိုး စစ်ရေးမဟာမိတ်အဖွဲ့နဲ့ ပူးပေါင်းဖို့ လျှောက်ထားလို့ တကယ်လို့များ တိုက်ခိုက်ခံရမယ်ဆိုရင် သူတို့ကို ပံ့ပိုးကူညီဖို့ အသင့်ရပ်တည်နေတယ်လို့ နော်ဝေ၊ ဒိန်းမတ်နဲ့ အိုက်စ်လန်နိုင်ငံတွေက မေ ၁၆ ရက်မှာ ပူးတွဲကြေညာချက် ထုတ်ပြန် ပြောဆိုလိုက်ပါတယ်။

ဖင်လန်နဲ့ ဆွီဒင်တို့ နေတိုးအဖွဲ့ဝင် အပြည့်အဝ ဖြစ်မလာသေးခင် သူတို့ ပိုင်နက်တွေကို တိုက်ခိုက်ခံခဲ့ရရင် သူတို့ ၂ နိုင်ငံကို ပံ့ပိုးကူညီဖို့ နော်ဝေက အဆင်သင့် ရပ်တည်နေမယ်လို့ နော်ဝေ ဝန်ကြီးချုပ် ယောနပ်စ် ဂါး စတူရဲလ်က မြို့တော်အော်စလိုက သတင်းစာရှင်းလင်းပွဲအတွင်း ပြောပါတယ်။

ဆွီဒင်အစိုးရက နေတိုးအဖွဲ့ဝင်ဖြစ်ရေး လျှောက်ထားဖို့ မေ ၁၆ ရက်နေ့ အစောပိုင်းမှာ တရားဝင် ဆုံးဖြတ်ခဲ့တာပါ။

ဒါကြောင့် စစ်အေးခေတ် တလျှောက်လုံးမှာ စစ်ရေးဘက်မလိုက်နိုင်ငံအဖြစ် ရပ်တည်ချက် အဆုံးသတ်သွားခဲ့ပါတယ်။

လျှောက်လွှာတွေ NATO ရဲ့ Brussels ရုံးချုပ်ကို မရောက်ခင် အတားအဆီးတစ်ခု ပေါ်လာခဲ့တာပါ။

တူရကီက ဖင်လန်နဲ့ ဆွီဒင်တို့ရဲ့ နေတိုးအဖွဲ့ဝင်ဖြစ်ရေး လျှောက်လွှာတွေကို အပြုသဘောနဲ့ ရှုမြင်မှာ မဟုတ်ဘူးလို့ ပြောခဲ့လို့ နေတိုး မဟာမိတ်တွေ အံ့အားသင့်ခဲ့ကြပါတယ်။

တူရကီကတော့ သူ့နိုင်ငံထဲက ကာဒစ်ရှ် စစ်သွေးကြွအုပ်စုတွေကို ဆွီဒင်နဲ့ ဖင်လန်က လက်ခံထား တဲ့ သမိုင်းကြောင်းကို ထောက်ပြ ကိုးကားခဲ့ပါတယ်။