မန္တလေးမြို့၊ ပြည်ကြီးတံခွန်မြို့နယ်၊ ၁၃၉ လမ်း၊ ၅၂ လမ်းနဲ့ ၅၃ လမ်းကြားမှာ မေ ၃၀ ရက်က ငွေကျပ် သိန်း ၉,၀၀၀ ကျော်တန်ဖိုးရှိ မူးယစ်ဆေးဝါးတွေ ဖမ်းဆီးရမိခဲ့ပါတယ်။

ကျောက်ဆည်မြို့နယ်၊ ကင်းကျေးရွာ၊ လောကမာန်အောင်ဘုရားအနီး၊ ရွာငံ-ဟံမြင့်မိုရ်သွား ကားလမ်းမှာ မော်တော်ယာဉ်တွေ ပိတ်ဆို့စစ်ဆေးနေစဥ် ရွာငံဘက်ကနေ ဟံမြင့်မိုရ်ဘက်ကို မောင်းနှင်လာတဲ့ ၁၂ ဘီး မော်တော်ယာဉ်ကို မသင်္ကာတဲ့အတွက် သက်ဆိုင်ရာအဖွဲ့တွေက လိုက်လံစုံစမ်းခဲ့ကြတယ်လို့ မှုခင်းမှတ်တမ်းမှာ ဖော်ပြထားပါတယ်။

၁၂ ဘီးယာဉ်ဟာ ပြည်ကြီးတံခွန်မြို့နယ်၊ စျရပ်ကွက်ရှိ နေအိမ်ဂိုထောင်ရှေ့မှာ ရပ်တန့်ထားတာကို တွေ့ရတဲ့အတွက် သွားရောက်စစ်ဆေးရာ ယာဥ်ပေါ်မှာ ယာဥ်မောင်း ဦးဟိန်းဝင်းစိုး (၂၅) နှစ်ကို တွေ့ရပြီး ယာဉ်နောက်ခန်း ကြမ်းခင်းအံဝှက်အတွင်းကနေ မူးယစ်ဆေးဝါးတွေ ရှာဖွေတွေ့ရှိခဲ့တယ်လို့ သိရပါတယ်။

အံဝှက်အတွင်း ကြွပ်ကြွပ်အိတ်အမည်းရောင်နဲ့ ပတ်ထုပ်ပြီး ရောင်စုံပလတ်စတစ်ဆပ်ပြာခွက်တွေနဲ့ ထည့်ထားတဲ့ ဘိန်းဖြူအမှုန့် ၉ ဒသမ ၉ ကီလိုဂရမ်၊ တန်ဖိုးငွေကျပ် ၂၄၇,၅၀၀,၀၀၀ ကျပ်နဲ့ စိတ်ကြွဆေးပြား စုစုပေါင်း ၃၃၆,၀၀၀ ပြား၊ အလေးချိန် ၃၀ ဒသမ ၂၄ ကီလို၊ တန်ဖိုးငွေကျပ် ၆၇၂,၀၀၀,၀၀၀ တို့ကို ရှာဖွေတွေ့ရှိခဲ့တာပါ။

ဒါ့အပြင် အိမ်စီးကားတစီးနဲ့အတူ ဦးတားရိုးစေး (၂၀) နှစ်ကို ထပ်မံဖမ်းဆီးရမိခဲ့တယ်လို့ သိရပါတယ်။

အမှုမှာ ဖမ်းဆီးရမိခဲ့တဲ့ ယာဉ်မောင်း ဟိန်းမင်းစိုး၊ မူးယစ်ဆေးလက်ခံမယ့် တာရိုးစေးနဲ့ မူးယစ်ဆေးသယ်ဆောင်ခိုင်းသူ ၂ ဦးတို့ကို (ပ)၁၂/၂၀၂၂၊ မူးယစ်ဆေးဝါးနှင့် စိတ်ကိုပြောင်းလဲစေတတ်သော ဆေးဝါးများဆိုင်ရာ ဥပဒေပုဒ်မ ၁၉(က)/၂၁ နဲ့ အမှုဖွင့်ထားပါတယ်။