ရှမ်းပြည်နယ်တောင်ပိုင်း၊ ပင်းတယမြို့နယ်မှာ ဇွန် ၁ ရက်မှ ဇွန် ၂ ရက်အတွင်း  စစ်ကောင်စီတပ်ဖွဲ့ဝင်တွေက ဒေသခံပြည်သူ ၁၀  ယောက်လောက်ကို ဖမ်းဆီးခဲ့တယ်လို့ ဒေသခံတွေထံက သိရပါတယ်။

ဖမ်းဆီးခံရသူတွေဟာ ကျောက်စုရွာ ကျေးရွာက  ၄ ယောက်၊ ကျောက်တစ်လုံးရွာက  ၁ ယောက်၊ တောင်ပေါ်ကြီးရွာက  ၁ ယောက်၊ ထွက်နီကျေးရွာက  ၂ ယောက်၊ မြို့ပေါ် ဟော်ကုန်းရပ်ကွက်က ၁ ယောက်၊ စျေးတန်းက ၁ ယောက်နဲ့ ရှမ်းရပ်ကဆရာမ ၁ ယောက် ဖြစ်တယ်လို့ ဒေသခံတစ်ဦးက ပြောပါတယ်။

"အကြောင်းအရင်း မရှိဘဲ အထင်နဲ့ဖမ်းပါပဲ။ သူတို့က လူကို အရင်ဖမ်းပြီးမှ အကြောင်းအရင်း ရှာကြတာချည်းပဲ။ PDF တွေနဲ့ အဆက်အသွယ်ရှိလို့၊ ဝရမ်းထုတ်ခံထားရသူတွေရဲ့ ပို့စ်တွေ Like လုပ်လို့ဆိုပြီး အကြောင်းပြချက်ရှာကြတာ။ ဘာမှရေရေရာရာရှိတာတော့ မဟုတ်ဘူး၊ သက်သက်ကို ဖမ်းနေကြတာ"လို့ ဆိုပါတယ်။

ဖမ်းဆီးခံထားရသူတွေဟာ အမျိုးသမီး ၄ ဦးနဲ့ အမျိုးသား ၆ ဦးတို့ဖြစ်ပြီး  သူတို့ကို ပင်းတယမြို့နယ် ရဲစခန်းမှာ ဖမ်းဆီးချုပ်နှောင်ထားတယ်လို့ သိရပါတယ်။

ပင်းတယမြို့ဟာ လက်ရှိအချိန်မှာ တိုက်ပွဲတွေ ငြိမ်သက်နေပြီး စစ်ကောင်စီတပ်ဖွဲ့ဝင်တွေက သူတို့မသင်္ကာတဲ့ သူမှန်သမျှကို မတရားဖမ်းဆီးနှိပ်စက်မှုတွေ ဆက်တိုက်ပြုလုပ်နေတာပါ။  

ဒါ့အပြင် မေ ၂၉ ရက် ညပိုင်းက  ရွာငံမြို့နယ် မြိုင်ကျေးရွာက အမျိုးသားတယောက်ကို  စစ်တပ်က လာရောက်ဖမ်းဆီးသွားပြီး နောက်တနေ့ မနက်မှာ အိမ်မှာ ရှိတဲ့ အဖိုးတန် ပစ္စည်းတွေကို လာရောက်ယူဆောင်သွားတယ်လို့ သိရပါတယ်။