ပရီးမီးယားလိဂ်ကလွယ်ကူတဲ့ပြိုင်ပွဲမဟုတ်ကြောင်း အာဆင်နယ်ကွင်းလယ်လူသစ် ဖေဘီယိုဗီအဲယာက ပြောကြားလိုက်ပါတယ်။

အသက် ၂၂ နှစ်ရှိပေါ်တူဂီ ယူ ၂၁ အသင်းခေါင်းဆောင်ဟာ အာဆင်နယ်အသင်းကို ပေါင် သန်း ၃၀ နဲ့ ပြောင်းရွှေ့လာခဲ့တာပါ။

ပေါ်တိုအသင်းဘက်ကလည်း တရားဝင်ကြေညာချက်ထုတ်ပြန်ခဲ့ပြီးနောက်မှာတော့ ပရီးမီးယားလိဂ်နဲ့ ပတ်သက်ပြီး ဗီအဲယာက သုံးသပ်မှုတစ်ခု ပြုလုပ်ခဲ့တာပါ။ 

“ပရီးမီးယားလိဂ်မှာကစားရမှာက လွယ်ကူမှာတော့မဟုတ်ဘူး။ ကျနော့်ဘက်က ကြိုးစားမှု တွေနဲ့ပဲရှေ့ဆက်သွားမယ်လို့ ကတိပြုပါတယ်။ အပြောင်းအရွှေ့ကိစ္စက ကလပ်အသင်း နှစ်သင်းနဲ့ အတူ ကျနော့်အေးဂျင့်ကလုပ်ဆောင်ပေးပြီးပါပြီ။ နှစ်သင်းစလုံးအတွက်အရေးပါတာကြောင့် စာချုပ်ကိစ္စကိုလည်း ကျ‌နော်လက်ခံခဲ့ပါတယ်။ ပရီးမီးယားလိဂ်ပွဲစဉ်တွေကိုတော့ တီဗီကနေ အမြဲလိုလိုကြည်ရူဖြစ် ပါတယ်” ဖာဘီယိုဗီအဲယာက ပြောပါတယ်။

ဗီအဲယာဟာ ကွင်းလယ်ညာခြမ်းနဲ့ ကွင်းလယ်တိုက်စစ် နေရာတွေမှာကစားနိုင်သူပါ။ ပြီးခဲ့တဲ့ရာသီက ပေါ်တိုအသင်းနဲ့အတူ ၂၇ ပွဲမှာ ၆ ဂိုးသွင်းပြီး ၁၄ ကြိမ် ဂိုးဖန်တီးမှုပြုလုပ်နိုင်ခဲ့ပါတယ်။