close

စီရော်နယ်ဒို အပြောင်းအရွှေ့ကိစ္စ ထပ်မမေးရန် မန်ယူနည်းပြ တန်ဟတ်ဂ် သတိပေး

တိုက်စစ်မှူး စီရော်နယ်ဒိုရဲ့ အပြောင်းအရွှေ့ကိစ္စနဲ့ ပတ်သက်ပြီး ထပ်မမေးဖို့ မန်ယူနည်းပြ အဲရစ်တန်ဟတ်ဂ်က သတိပေးပြောကြားလိုက်ပါတယ်။

မန်ယူအသင်းဟာ ထိုင်းနိုင်ငံ၊ ဘန်ကောက်မြို့မှာ လီဗာပူးနဲ့ ကစားခဲ့ပြီးနောက်  သြစတြေးလျနိုင်ငံ မဲလ်ဘုန်းမြို့ကို ရောက်ရှိနေတာပါ။

မဲလ်ဘုန်းဗစ်ထရီအသင်းနဲ့ ခြေစမ်းပွဲစဉ်မတိုင်ခင် သတင်းစာရှင်းလင်းပွဲမှာ မီဒီယာသမားတဦးက စီရော်နယ်ဒိုရဲ့ အနာဂတ်နဲ့ ပတ်သက်လို့ ထပ်မံမေးမြန်းခဲ့ရာမှာ အရင်က ထုတ်ပြန်ချက်အတိုင်းဖြစ်ပြီး ဘာမှပြောင်းလဲမှုမရှိကြောင်း အဲရစ်တန်ဟတ်ဂ်က ပြန်လည်ဖြေကြားခဲ့တာပါ။

နည်းပြ အဲရစ်တန်ဟတ်ဂ်ဟာ ဘန်ကောက်မှာကတည်းက ရော်နယ်ဒိုဟာ ရောင်းချဖို့မဟုတ်ဘဲ အသင်းရဲ့အစီအစဉ်မှာ ပါဝင်နေဆဲဖြစ်ပြီး အောင်မြင်မှုတွေကို အတူတကွ ရယူချင်တယ်လို့ အတိအလင်း ပြောခဲ့တာပါ။

စီရော်နယ်ဒိုဟာ မိသားစုအကြောင်းကိစ္စနဲ့ အသင်းရဲ့ အာရှခရီးစဉ်ကို လိုက်ပါလာခြင်း မရှိခဲ့ဘဲ အသင်းပြောင်းရွှေ့ခွင့်ပါ တောင်းဆိုထားတာ ဖြစ်ပါတယ်။

မန်ယူအသင်းဟာ သြစတြေးလျမှာ ခြေစမ်းပွဲ ၃ ပွဲ ကစားမှာဖြစ်ပြီး နော်ဝေမှာ အက်သလက်တီကိုနဲ့လည်း ခြေစမ်းကစားဦးမှာပါ။

အဲဒီနောက် အိုးထရက်ဖို့ဒ်မှာ စပိန်ကလပ် ဗလက်ကာနိုနဲ့ နောက်ဆုံးခြေစမ်းပွဲ ကစားသွားမှာ ဖြစ်ပါတယ်။

//
Up