အမေရိကန်သမ္မတ ဂျိုးဘိုင်ဒင် ကိုဗစ်-၁၉ ကူးစက်ခံထားရပေမယ့် တာဝန်တွေကို ဆက်လက် ထမ်းဆောင်နေမယ်လို့ အိမ်ဖြူတော်က ဇူလိုင် ၂၁ ရက်မှာ ပြောပါတယ်။ 

ကိုဗစ်-၁၉ ကူးစက်ခံထားရပေမယ့် အသက် ၇၉ နှစ်အရွယ် သမ္မတရဲ့ ကျန်းမာရေးအခြေအနေ ကောင်းမွန်နေတယ်လို့ အိမ်ဖြူတော်က ပြောပါတယ်။ 

သမ္မတဟာ ကာကွယ်ဆေး နှစ်ကြိမ်နဲ့ နောက်ဆက်တွဲ booster နှစ်ကြိမ်၊ စုစုပေါင်း ၄ ကြိမ် ထိုးထားပြီး အခု ကိုဗစ် ကူးစက်တဲ့ လက္ခဏာကလည်း စိုးရိမ်စရာမရှိတဲ့ အပျော့စား ဖြစ်တယ်လို့ ဆိုပါတယ်။ 

လောလောဆယ်မှာ သမ္မတကို အိမ်ဖြူတော်မှာပဲ သီးသန့်ထားပြီး လိုအပ်တဲ့ ကုသမှုပေးနေတဲ့ တချိန်တည်းမှာ အိမ်ဖြူတော် ဝန်ထမ်းတွေနဲ့လည်း တယ်လီဖုန်းနဲ့ ဆက်သွယ်ညွှန်ကြားတာ၊ အစည်းအဝေးတွေကို ပုံမှန် အတိုင်း တက်တာတွေကို အချိန်ပြည့် တာဝန်ထမ်းဆောင်နေတယ်လို့ အိမ်ဖြူတော် ပြောခွင့်ရသူ ကရင်း ယွန်ပီးယားက ပြောပါတယ်။