အာဖဂန်နစ္စတန်နိုင်ငံ မြို့တော် ကဘူးလ်မှာ တာလီဘန်အာဏာပိုင်တွေဟာ သြဂုတ် ၂ ရက် မနက်ပိုင်းက အယ်လ်ကိုင်းဒါးခေါင်းဆောင် အိုင်မန် အယ်လ် ဇာဝါဟီရီ သေဆုံးသွားခဲ့တဲ့ နေရာအနီးမှာ လုံခြုံရေး တင်းကျပ်ထားပါတယ်။

မြင်သာတဲ့ ပျက်စီးဆုံးရှုံးမှုတွေကို မတွေ့မြင်ရပေမဲ့လည်း အဲဒီနေရာအနီးမှာ လက်နက်ကိုင် တာလီဘန်စစ်သားတွေနဲ့ လူအသွားအလာ ကင်းမဲ့နေတဲ့ လမ်းတွေကို တွေ့နေရပါတယ်။

အသက် ၇၁ နှစ်အရွယ် ဇာဝါဟီရီဟာ ဒီသီတင်းပတ်ကုန်က အမေရိကန်ရဲ့ ဒရုန်းတိုက်ခိုက်မှုအတွင်း သေဆုံးသွားတာဖြစ်ကြောင်း အမေရိကန်သမ္မတ ဂျိုးဘိုင်ဒင်က သြဂုတ် ၁ ရက် ညပိုင်း ရုပ်မြင်သံကြား တိုက်ရိုက်လွှင့်ချိန်အတွင်း ပြောကြားခဲ့ပါတယ်။

တိုက်ခိုက်မှုဟာ ဇူလိုင် ၃၁ ရက်မှာ ဖြစ်ပွားခဲ့ကြောင်း အမေရိကန် တာဝန်ရှိသူတွေက ပြောကြားခဲ့ပါတယ်။

တာလီဘန် ပြောရေးဆိုခွင့်ရှိသူ ဇာဘီဟူလာ မူဂျာဟစ်က တိုက်ခိုက်မှုဖြစ်ပွားကြောင်း အတည်ပြုခဲ့ပြီး ဒါဟာ နိုင်ငံတကာမူတွေကို ချိုးဖောက်လိုက်ခြင်းပဲလို့ သုံးနှုန်းပြီး ပြင်းပြင်းထန်ထန် ရှုတ်ချလိုက်ပါတယ်။

ဇာဝါဟီရီဟာ ပါကစ္စတန်နဲ့ အာဖဂန်နစ္စတန်ကြားက တားမြစ်ထားတဲ့ နယ်စပ်တလျှောက်မှာ နှစ်ပေါင်းများစွာ ပုန်းအောင်းနေခဲ့တယ်လို့ ယူဆရပါတယ်။