ဆီးရီးယားမှာ စစ်ရေးအရ အရှိန်မြှင့်လုပ်ဆောင်နေတာဟာ လက်ခံနိုင်စရာမရှိဘူးလို့ ရုရှားနိုင်ငံခြားရေးဝန်ကြီး ဆာဂီလာ့ဗရော့ဗ်က သြဂုတ် ၂၃ ရက်မှာ ပြောလိုက်ပါတယ်။

ဆီးရီးယားနိုင်ငံမြောက်ပိုင်းက စစ်ဆင်ရေးအသစ်နဲ့ပတ်သက်ပြီး ဆွေးနွေးပြောဆိုနေတာတွေ နောက်ပြန်ဆုတ်စေဖို့ တူရကီသမ္မတ တာယစ်အာဒိုဝမ်ကို ဆွဲဆောင်ဖျောင်းဖျဖို့ ရည်ရွယ်ပြီး မှတ်ချက်ပြု ပြောဆိုလိုက်တာပါ။

ဘယ်လိုစစ်ဆင်ရေးအသစ်ကိုမဆို ဟန့်တားဖို့ တူရကီနဲ့ ညှိနှိုင်းရေး၊ ရုရှားနဲ့ ဆီးရီးယားတို့ ဆွေးနွေးညှိနှိုင်းဖို့ ကြိုးပမ်းနေတယ်လို့ ဆီးရီးယား နိုင်ငံခြားရေးဝန်ကြီး ဖိုင်ဆယ်မက်ဒက်နဲ့အတူ မော်စကိုမြို့တော်မှာလုပ်တဲ့ သတင်းစာရှင်းလင်းပွဲမှာ လာ့ဗရော့ဗ်က ပြောပါတယ်။

ဆီးရီးယားကို အစ္စရေးက ဒုံးကျည်နဲ့  တိုက်ခိုက်ခဲ့တာကိုလည်း လာ့ဗရော့ဗ်က ရှုတ်ချခဲ့ပါတယ်။ တချိန်က နွေးထွေးခဲ့တဲ့ ရုရှား-အစ္စရေး ဆက်ဆံရေးကို အေးခဲသွားစေတဲ့ မှတ်ချက်တွေနဲ့  သူက ရှုတ်ချခဲ့တာပါ။

ရုရှားဟာ ဆီးရီးယားသမ္မတ ဘာရှားအယ်လ်အာဆတ်နဲ့ သူ့အစိုးရကို အဓိက ကျောထောက်နောက်ခံ ပေးသူပါ။

“ကုလလုံခြုံရေးကောင်စီရဲ့ ဆုံးဖြတ်ချက်တွေကို အစ္စရေးက လေးစားလိုက်နာဖို့နဲ့ ဆီးရီးယားရဲ့ အချုပ်အခြာအာဏာနဲ့ နယ်မြေပိုင်ဆိုင်မှုကို လေးစားဖို့ ကျနော်တို့ တောင်းဆိုထားပါတယ်” လို့လည်း လာ့ဗရော့ဗ်က ပြောပါတယ်။

အစ္စရေးဟာ အာဆတ်ရဲ့ ဘိုးဘွားတွေ နေထိုင်ရာ ဒေသ၊ မြေထဲပင်လယ်ကမ်းရိုးတန်းက ရုရှားရဲ့ အဓိက ဆီးရီးယား အခြေစိုက်စခန်းတွေနဲ့လည်း နီးကပ်တဲ့ အီရန်ပစ်မှတ်တွေကို ဩဂုတ် ၁၄ ရက်က ဆက်တိုက် တိုက်ခိုက်ခဲ့တယ်လို့ ဒေသတွင်း ထောက်လှမ်းရေးနဲ့ ဆီးရီးယား စစ်ဘက်သတင်းရင်းမြစ်တွေက ပြောခဲ့ပါတယ်။