ထိုင်း-မြန်မာနယ်စပ် တာ့ခ်ခရိုင် ထာ့ဆောင်ယန်းမြို့နယ်ထဲမှာ မနေ့က မိုးဆက်တိုက်ရွာသွန်းတာကြောင့် ချောင်းရေလျှံတက်ပြီး လူနေအိမ်ခြေရပ်ကွက်ထဲ ရေဝင်နေတယ်လို့ မဲဆောက်ဒေသတွင်းသတင်းမှာ ဖော်ပြပါတယ်။ 

အထူးသဖြင့် မဲ့ဖိုး၊ ဘန့်မိုင်၊ မဲ့ဒန့် စတဲ့ ချောင်းရေလျှံကျတာကြောင့် မဲ့ဒန့်အုပ်စုရပ်ကွက် ၁ , ၂ , ၆ , ၇ နဲ့ ၉ ရက်ကွက်ထဲ ရေဝင်ပြီး အိမ်ခြေ ၂၀ ကျော် ရေဘေးသင့်ခဲ့ရတယ်လို့ ဆိုပါတယ်။

ဒါ့အပြင် မဲဆောက် - မဲ့စရီးယန်သွား အမှတ် ၁၀၅ ကားလမ်းမကြီး ကီလိုမီတာအမှတ် ၉၁ မှာ သစ်ပင်တွေကျိုးကျပြီး ကားလမ်းပိတ်ဆို့နေတယ်လို့ ဆိုပါတယ်။ 

အဆိုပါနေရာကို မြို့နယ်အုပ်ချုပ်ရေးရုံး၊ နယ်မြေခံရဲတပ်ဖွဲ့၊ စစ်တပ်နဲ့ လူမှုကယ်ဆယ် ရေးအဖွဲ့တွေက အမြန်ဆုံးရှင်းလင်းနေပြီး ရေဝင်တဲ့ရပ်ကွက်ထဲမှာ ရေစုပ်ထုတ်တာနဲ့ ရေဘေး သင့်ပြည်သူကို ကူညီရေးတွေ လုပ်နေတယ်လို့ ဆိုပါတယ်။

ထိုင်းနိုင်ငံထဲမှာ “မ-အွန်” အမည်ရှိ မုန်တိုင်းကယက်ကြောင့် လာမယ့် ၂၄ နာရီအတွင်း ခရိုင်ပေါင်း ၆၅ ခရိုင် (တနိုင်ငံလုံးနီးပါး) မိုးရွာသွန်းနိုင်ပြီး အချို့နေရာတွေမှာ မိုးသည်းထန်ကာ ရုတ်တရက် ရေကြီးနိုင်တယ်လို့  ထိုင်းမိုးဇလဌာနက ဒီနေ့မနက် ၆ နာရီမှာ ထုတ်ပြန်ထားပါတယ်။ 

ဒါကြောင့် ပြည်သူတွေအနေနဲ့ ရေဘေးသတိထားဖို့၊ အထူးသဖြင့် တောင်တန်းဒေသတွေမှာ တောင်ကျချောင်းရေ ကျလာမယ့် ဘေးအန္တရာယ်ကို ကြိုတင်ကာကွယ်ဖို့  မိုးဇလဌာနက သတိ ပေးထားပါတယ်။