ချဲလ်ဆီးအသင်းနဲ့ပွဲစဉ်မှာ ချေပဂိုး ပြန်လည်ပယ်ဖျက်ခံလိုက်ရတာနဲ့ ပတ်သက်ပြီး VAR ဒိုင်လူကြီး တွေကို အယုံကြည်မရှိတော့ကြောင်း နည်းပြမိုယက်စ်က ဝေဖန်လိုက်ပါတယ်။

ဝက်စ်ဟမ်းအသင်းဟာ ပွဲချိန် မိနစ် ၉၀မှာ လူစားဝင်ကစားသမား ကော်နက်က ချေပဂိုးသွင်းခဲ့ပေမဲ့ အဲဒီမတိုင်ခင်မှာ ချဲလ်ဆီး ဂိုးသမားမန်ဒီကို ဘိုဝင်က ပြစ်ဒဏ်ဘောကျူးလွန်ခဲ့တယ်ဆိုပြီး ဂိုးကိုပယ်ဖျက်ခဲ့တာပါ။

နည်းပြမိုယက်စ်ရဲ့အမြင်မှာတော့ ပြစ်ဒဏ်ဘောမဖြစ်ဘဲ ဂိုးသမားမန်ဒီက ဒဏ်ရာရရှိသယောင် ဟန်ဆောင်ခဲ့တာဖြစ်ကြောင်း ဝေဖန်သွားပါတယ်။

မိုယက်စ်က “မန်ဒီဟာ ပထမပေးလိုက်ရတဲ့သွင်းဂိုးမှာလည်း ဒဏ်ရာရရှိ သယောင်ဟန်ဆောင်ခဲ့သေးတယ်။ ဝမ်းနည်းစရာကောင်းတာက ဒီလိုအထက်တန်းအလွှာအဆင့်မှာ ဒီလိုဒိုင်လူကြီးတွေရှိနေတာပါပဲ။ သူတို့မှာ လူသစ်တွေကို တာဝန်ပေးတာရှိတယ်။ ကျနော်ကတော့ သူတို့ကို အယုံအကြည်မရှိပါဘူး” လို့ပွဲအပြီးမှာ ဝေဖန်ပါတယ်။

ဒါ့အပြင် VAR ဒိုင်တွေအနေနဲ့ ကွင်းလယ်ဒိုင်ကို ကွင်းဘေးက တီဗီမော်နီတာဆီပြန် လည်ကြည့်ရှုခိုင်းတာကို အံ့အားသင့်မိကြောင်း၊ ဒိုင်လူကြီးအနေနဲ့ ရှင်းလင်းစွာမြင်ပြီးသား အခြေအနေကနေ VAR ကိုပြန်ကြည့်ပြီး သွင်းဂိုး ခွင့်မပြုခဲ့တာဟာ ဆိုးရွားတဲ့ ဆုံးဖြတ်ချက်ဖြစ်ကြောင်း မိုယက်စ်ကဝေဖန်သွားခဲ့ပါတယ်။