ယူကရိန်းနိုင်ငံရှိ ရုရှားထိန်းချုပ်ထားတဲ့ ဇာပိုရစ်ဇီယားနျူကလီးယား ဓာတ်အားပေးစက်ရုံရဲ့ ဘေးကင်းရေး အစီရင်ခံစာကို လာမယ့်သီတင်းပတ်အစောပိုင်းမှာ ထုတ်ပြန်ဖို့ စီစဉ်ထားကြောင်း ကုလသမဂ္ဂ အဏုမြူစောင့်ကြည့်ရေးအဖွဲ့ခေါင်းဆောင်  ရာဖဲလ်ဂရော့စ်စီက စက်တင်ဘာ ၂ ရက်မှာ ပြောကြားခဲ့ပါတယ်။ 

စက်ရုံကနေ ဗီယင်နာကို ပြန်လည်ရောက်ရှိလာတဲ့ သတင်းစာရှင်းလင်းပွဲမှာ ဂရော့စ်စီက “စက်ရုံတဝိုက်မှာ စစ်ရေးလှုပ်ရှားမှုတွေတွေ့နေရပြီး သူနဲ့သူ့အဖွဲ့ကိုယ်တိုင် အပေါက်တွေ၊ အမြောက်ပစ်ခံရတဲ့ အဆောက်အဦတွေပေါ်က အမှတ်အသားတွေကို တွေ့မြင်ခဲ့ရပြီး ဒါဟာ စက်ရုံရဲ့ ရုပ်ပိုင်းဆိုင်ရာ ကြံ့ခိုင်မှုကို တကြိမ်မက အကြိမ်ပေါင်းများစွာ ချိုးဖောက်ခဲ့တာ”လို့ ပြောပါတယ်။

ဘာကြောင့်ပဲဖြစ်ဖြစ် စက်ရုံကိုပစ်ခတ်နေတာဟာ ကင်နက်တစ်ပါဝါနဲ့ မဆိုင်ပဲ ဘေးကင်းမှုနဲ့ လုံခြုံရေးစံနှုန်းတွေအရ ဘယ်လိုနည်းနဲ့မဆို လက်ခံလို့မရတဲ့အရာတစ်ခုလို့လည်း ဆိုပါတယ်။

ရုရှားရဲ့ပစ်ခတ်မှုကြောင့် အဲဒီနေရာမှာ လည်ပတ်ဆဲ ဓာတ်ပေါင်းဖို နှစ်ခုထဲက တခုကို ပိတ်ပစ်ခဲ့ရကြောင်း ယူကရိန်းနိုင်ငံပိုင် နျူကလီးယားကုမ္ပဏီ Energoatom က အစောပိုင်းတုန်းက ပြောကြားခဲ့ပါတယ်။ အခုချိန်မှာတော့ အရန်ဒီဇယ်မီးစက်တွေ အလုပ်လုပ်နေကြောင်း ထပ်လောင်း ပြောကြားခဲ့ပါတယ်။

ဂရော့စ်စီဟာ သူတို့အဖွဲ့ရဲ့ လေ့လာတွေ့ရှိချက်တွေနဲ့ပတ်သက်ပြီး  စက်တင်ဘာ ၆ ရက်နေ့ ကုလသမဂ္ဂ လုံခြုံရေးကောင်စီကို ရှင်းလင်းတင်ပြမှာဖြစ်ပါတယ်။