စစ်ကောင်စီဟာ မြောက်ဦးမြို့နယ်အတွင်း စစ်ကြောင်းတွေ လှည့်လည်သွားလာကာ မသမာတဲ့ လုပ်ရပ်တွေကို ပြုလုပ်ဖို့ ကြံစဉ်နေတယ်လို့ ရက္ခိုင့်တပ်မတော် (အေအေ) က ထုတ်ပြန်ပါတယ်။

စစ်ကောင်စီတပ်က စက်တင်ဘာ ၄ ရက်နေ့မှာလည်း မြောက်ဦးဈေးကို မီးရှို့ဖို့ ကြံစည်တဲ့လုပ်ရပ်ကို လုပ်ဆောင်ဖို့ ကြိုးစားခဲ့ကြတယ်လို့ ဆိုပါတယ်။  

ဒါ့အပြင် စစ်ကောင်စီတပ်ဟာ တိုက်ပွဲတုတွေကို ဖန်တီးကာ မြို့တွင်းလူနေအိမ်၊ သမိုင်းဝင် စေတီပုထိုးနဲ့ ကမ္ဘာ့ယဉ်ကျေးမှု အမွေအနှစ်ရှိရာတွေကို လက်နက်ကြီး၊ လက်နက်ငယ်တွေနဲ့ ပစ်ခတ်တိုက်ခိုက်တဲ့ ဖြစ်ရပ်တွေ အကြိမ်ကြိမ်ရှိခဲ့ကြောင်းလည်း ဖော်ပြပါတယ်။

ဒါ့ကြောင့် နိုင်ငံတကာအဖွဲ့အစည်း၊ နိုင်ငံတကာအသိုင်းအဝိုင်း၊ စစ်ရာဇဝတ် စောင့်ကြည့်ရေး အဖွဲ့တွေ၊ တာဝန်သိပြည်သူတွေအနေနဲ့ စစ်ကောင်စီရဲ့ အခုရက်ပိုင်းအတွင်း ရခိုင်ပြည်နယ် မြို့နယ်အသီးသီးရဲ့ မြို့ပေါ်မှာ သွားလာလှုပ်ရှားနေမှုနဲ့ လုပ်ရပ်တွေကို အထူးသတိထား စောင့်ကြည့်ဖို့ တိုက်တွန်းထားပါတယ်။

စစ်ကောင်စီတပ်ဖွဲ့တွေဟာ မြန်မာပြည်အနှံ့ ဖြစ်ပွားနေတဲ့ တိုက်ပွဲတွေမှာ အထိနာ အကျအဆုံးများပြီး စိတ်ဓာတ်ပျက်ပြားနေတဲ့အတွက် သူတို့ လုပ်နေကျ လုပ်ရပ်ထဲက ပြည်သူလူထုကို ပစ်မှတ်ထားတိုက်ခိုက်တာ၊ အပြစ်မဲ့ပြည်သူတွေကို အကြောင်းအမျိုးမျိုးပြ ဖမ်းဆီးတာ၊ ပစ်ခတ်သတ်ဖြတ်တာ၊ ရပ်ရွာမီးရှို့တာ စတဲ့ လုပ်ရပ်တွေကို ဆက်တိုက်ကျူးလွန်နေကြောင်းလည်း  အေအေရဲ့ ထုတ်ပြန်ချက်မှာ ဖော်ပြပါတယ်။

ပြီးခဲ့တဲ့ ဩဂုတ်လ ၂၈ ရက်နေ့ကလည်း မြောက်ဦးမြို့ပတ်ဝန်းကျင်ကို လက်နက်ကြီး၊ လက်နက်ငယ်တွေနဲ့ ပစ်ခတ်တိုက်လိုက်ခဲ့တဲ့အတွက် မြောက်ဦး၊ ကင်းဆိပ်ရွာမှ အပြစ်မဲ့ ပြည်သူ ၃ ဦးသေဆုံးကာ ဒဏ်ရာရသူ ၉ ဦးအထိ ရှိခဲ့တယ်လို့ ဆိုပါတယ်။

ဒါ့အပြင် စက်တင်ဘာ ၄ ရက်နေ့က မြောက်ဦးမြို့ပတ်ဝန်းကျင်ရှီ ရှေးဟောင်းအမွေအနှစ် နန်းရာကုန်းအပါအဝင် လူနေရပ်ကွက်တွေကို စစ်ကောင်စီ တပ်စခန်းကနေပြီး တိုက်ပွဲဖြစ်ပွားခြင်းမရှိဘဲ လက်နက်ကြီး လက်နက်ငယ်တွေနဲ့ ရမ်းသမ်းပစ်ခတ်ခဲ့ကြောင်း ဖော်ပြပါတယ်။

စစ်ကောင်စီ ခေါင်းဆောင်တွေဟာ လူစိတ်ကင်းမဲ့ပြီး သွေးရူသွေးတန်းဖြစ်ကာ ရာဇဝတ်မှုကို ဦးတည်စေတဲ့ အမိန့်ပေးခြင်းနဲ့ လုပ်ရပ်တွေကို မြန်မာနိုင်ငံအနှံ့ ဆက်တိုက် လုပ်ဆောင်နေကြောင်းလည်း ထောက်ပြထားပါတယ်။