ဇာပိုရစ်ဇီးယား နျူကလီယာ ဓာတ်အားပေးစက်ရုံ အနီးတဝိုက်မှာ နျူကလီးယား ဘေးကင်းရေးနဲ့ လုံခြုံရေး ကာကွယ်ရေးဇုန် ထူထောင်ရေးအတွက် ရုရှားနဲ့ ယူကရိန်း နှစ်နိုင်ငံစလုံးဟာ နိုင်ငံတကာ အဏုမြူစွမ်းအင်အေဂျင်စီ (IAEA) အလုပ်အဖွဲ့နဲ့ အဆက်အသွယ်ရှိကြောင်း ကုလသမဂ္ဂ နျူကလီးယားစောင့်ကြည့်ရေး ညွှန်ကြားရေးမှူးချုပ် ရာဖှဲလ်ဂရော့ဆီက စက်တင်ဘာ ၁၂ ရက် သတင်းစာရှင်းလင်းပွဲမှာ ပြောပါတယ်။

နျူကလီးယား မတော်တဆမှုကို ရှောင်ရှားနိုင်ဖို့အတွက် မရှိမဖြစ် လိုအပ်တဲ့ ဓာတ်အားလိုင်းတွေကို ဖြတ်တောက်လိုက်ရခြင်း အပါအဝင် အဆောက်အဦတွေလည်း ပျက်စီးခဲ့ရတဲ့ အဏုမြူဓာတ်အားပေးစက်ရုံရဲ့ နေရာတွေမှာ ပစ်ခတ်တိုက်ခိုက်မှုတွေအတွက်  ရုရှားနဲ့ ယူကရိန်းတို့ဟာ အပြန်အလှန် အပြစ်တင်ခဲ့ကြပါတယ်။

ဂရော့ဆီ ကတော့ နှစ်ဖက်စလုံးကို ပစ်ခတ်မှု ချက်ချင်းရပ်တန့်ပေးဖို့နဲ့ စက်ရုံပတ်လည်မှာ ပိုပြီး နည်းလမ်းတကျဖြစ်မယ့် နျူကလီးယား ဘေးကင်းရေးနဲ့ လုံခြုံရေး ကာကွယ်ရေးဇုန်ကို တောင်းဆိုထားပါတယ်။

ဇာပိုရစ်ဇီးယား နျူကလီးယားစက်ရုံ ဘေးကင်းရေးအတွက် တခုတည်းသော နည်းလမ်းမှာ အဲဒီစက်ရုံအပေါ် ရုရှားရဲ့ထိန်းချုပ်မှုကို ဖယ်ရှားပြီး ယူကရိန်းလက်ကို ပြန်လွှဲပြောင်းခြင်းကသာ တခုတည်းသောနည်းလမ်း ဖြစ်ကြောင်း ယူကရိန်းနိုင်ငံခြားရေးဝန်ကြီး ဒီမစ်ထရို ကူလေဘာက စက်တင်ဘာ ၁၂ ရက်မှာ ပြောပါတယ်။

အဲဒီနေ့မှာပဲ ကရင်မလင် ပြောရေးဆိုခွင့်ရှိသူ ဒီမစ်ထရီပက်စ်ကော့ဗ်က ဇာပိုရစ်ဇီးယား နျူကလီယာစက်ရုံမှ ရုရှားတပ်တွေ ဆုတ်ခွာရေးကို မဆွေးနွေးရသေးကြောင်းနဲ့ အခု စက်ရုံရဲ့ အဆောက်အဦတွေကို အဆက်မပြတ် ပစ်ခတ်နေခြင်းကို ရပ်တန့်ဖို့ ယူကရိန်းကို အာရုံစိုက်နေတာလို့ ပြောပါတယ်။