အိန္ဒိယ-မြန်မာနယ်စပ်၊ စစ်ကိုင်းတိုင်း၊ တမူးမြို့အဝင် ၄ မိုင်ဂိတ်အနီးမှာ စစ်ကောင်စီတပ်နဲ့ ပြည်သူ့ကာကွယ်ရေး ပူးပေါင်းတပ်ဖွဲ့တို့ကြား စက်တင်ဘာ ၁၉ ရက် ညနေပိုင်းက တိုက်ပွဲတွေ အပြင်းအထန် ဖြစ်ပွားခဲ့တယ်လို့ ဒေသခံတွေက ပြောပါတယ်။

အဆိုပါတိုက်ပွဲမှာ တမူးပြည်သူ့ကာကွယ်ရေးတပ်ဘက်က ရဲဘော် ၂ ယောက် ကျဆုံးခဲ့ပြီး စစ်ကောင်စီဘက်က ထိခိုက်ကျဆုံးမှု များပြားနိုင်ပေမဲ့ အတည်ပြုလို့မရခဲ့ကြောင်း တမူး PDF တာဝန်ရှိသူက ပြောပါတယ်။

“ကျဆုံးသွားတဲ့ ရဲဘော်တွေကတော့ BSO (Burmese Student Organization) က မောင်အာကာထက် (၁၈ နှစ်) နဲ့ ပ.က.ဖ က ရဲဘော်လင်းယုန် (၄၀ နှစ်ကျော်) တို့ဖြစ်ပါတယ်။ ရဲဘော်လင်းယုန်ရဲ့ အလောင်းကတော့ ပြန်မကောက်နိုင်ခဲ့ဘဲ တမူးနာရေးကူညီမှုအသင်းက မီးသင်္ဂြိုဟ်ပေးခဲ့တယ်။ တိုက်ပွဲဖြစ်တာက အချိန်ကြာပြီး မိုးချုပ်နေပြီ။ ပြန်ဆုတ်တဲ့အချိန်မှာ လင်းယုန်က ပါမလာတော့ ပျောက်တယ်ထင်နေတာ၊ ဒီမနက်မှပဲ ကျသွားမှန်း သိလိုက်ရတယ်။ မနေ့က နမွန်းတားရွာနားမှာ တကြိမ်၊ ၄ မိုင်ဂိတ်မှာ တကြိမ် စစ်ကောင်စီယာဉ်တန်းကို မိုင်းဆွဲတိုက်ခိုက်တာ အတော်ထိတယ်။ အတည်ပြုလို့တော့ မရခဲ့ဘူး။”

နွေဦးတော်လှန်ရေး စတင်တဲ့အချိန်ကစပြီး ဒီနေ့အထိ တမူးမြို့နယ်မှာ ပြည်သူ့ကာကွယ်ရေးတပ်ဖွဲ့ဝင် ရဲဘော် ၁၁ ယောက် ကျဆုံးသွားပြီလို့ သိရပါတယ်။

လက်ရှိမှာ ခရီးသွားပြည်သူတွေ၊ ဒေသခံတွေအနေနဲ့ တမူးမြို့နယ်မှာ စစ်ကောင်စီတပ်တွေက အကြောင်းမဲ့ ရမ်းသန်းပစ်ခတ်နေပြီး ကလေး-တမူးလမ်းကြောင်းမှာ စစ်ရေးတင်းမာနေတဲ့ အတွက် အချိန်မရွေး နေရာမရွေး တိုက်ပွဲတွေ ဖြစ်ပွားနိုင်တာကြောင့် တမူး-ကလေးလမ်းပိုင်းကို အသုံးမပြုကြဖို့ တမူး PDF က သတိပေးထားပါတယ်။

တမူးမြို့နယ်မှာ စစ်အာဏာသိမ်းပြီးချိန်ကစပြီး ဇွန်လကုန်အထိ အရပ်သားပြည်သူ ၁၉ ယောက်ထက်မနည်း သတ်ဖြတ်ခံခဲ့ရပြီး ဖမ်းဆီးခံရသူ ၆ ယောက်ထက်မနည်း ရှိလာကာ မီးရှို့ဖျက်ဆီးခံရတဲ့ အိမ်ခြေ ၁၉ လုံးထက်မနည်း ရှိလာပြီလို့ ကူကီး ကျောင်းသားလူငယ်အဖွဲ့အစည်းက ထုတ်ပြန်ထားပါတယ်။