စစ်ကိုင်းတိုင်း၊ ရေဦးမြို့အလယ် နာရီစင်နားက ကမ္ဘောဇဘဏ်အနီးမှာ ဒီနေ့ စက်တင်ဘာ ၂၂ ရက် နေ့လယ် ၁၂ နာရီလောက်က ဗုံးပေါက်ကွဲခဲ့တယ်လို့ ဒေသခံတွေက ပြောပါတယ်။

ဒေသခံပြည်သူတယောက်က “ပေါက်ကွဲတာက ကမ္ဘောဇဘဏ်ရဲ့ အရှေ့ဘက်ကပ်လျက်မှာ ပေါက်ကွဲခဲ့တာဗျ။ ပေါက်ကွဲပြီး စစ်(--)တွေလာပြီး စစ်ဆေးမှာကြောက်လို့ အကုန်ထွက်ပြေးရခဲ့တယ်။ အထိအခိုက်ကတော့ ရှိမရှိတော့ သေချာမသိရသေးဘူး။ ပေါက်ကွဲပြီး မကြာဘူး၊ စစ်(--)တွေရောက်လာပြီး အကုန်စစ်ဆေးနေတယ်လို့တော့ သိထားရတယ်။ စစ်ဆေးတာက အဲ့ဘဏ်အနီးတင်မကဘူး၊ တမြို့လုံး တလမ်းဝင် တလမ်းထွက် စစ်ဆေးနေသလို မြို့ဝင် မြို့ထွက်လမ်းတွေပါ ပိတ်ဆို့စစ်ဆေးနေတယ်” လို့ ပြောပါတယ်။

အဆိုပါဘဏ်ဟာ ငွေသွင်း ငွေထုတ်လုပ်ဆောင်တာကို လူဦးရေ အကန့်အသတ်နဲ့ ထုတ်ပေးနေတဲ့ ဘဏ်တခုဖြစ်သလို အခုလို ဘဏ်အနီး ဖောက်ခွဲရေးလုပ်ဆောင်တာဟာ ဘယ်အဖွဲ့အစည်းက ပြုလုပ်တယ် ဆိုတာကိုတော့ လတ်တလော အတည်ပြုချက် ရယူနိုင်ခြင်း မရှိသေးပါဘူး။

ရေဦးမြို့ပေါ်မှာ စစ်ကောင်စီတပ်တွေ လုံခြုံရေးတင်းကျပ်ထားပေမဲ့ အခုလို ပေါက်ကွဲတာဟာ စစ်ကောင်စီကပြုလုပ်ပြီး PDF ကို အမည်ဖျက်ချင်လို့ အခုလိုပြုလုပ်တာ ဖြစ်နိုင်တယ်လို့ ရေဦးမြို့ ဒေသခံတွေက ပြောဆိုနေကြပါတယ်။