တနင်္သာရီတိုင်း၊ မြိတ်ခရိုင်၊ ပုလောမြို့နယ် ထမင်းမစားရွာမှာ တိုက်ပွဲဖြစ်ပွားခဲ့ပြီး ချိတ်ပိတ်ခံထားရတဲ့ PDF တပ်ဖွဲ့ဝင်ရဲ့နေအိမ် မီးရှို့ဖျက်ဆီးခံလိုက်ရတယ်လို့ ဒေသခံတွေထံက သိရပါတယ်။

စက်တင်ဘာ ၂၃ ရက် မနက် ၈ နာရီဝန်းကျင်က ပြည်သူ့ကာကွယ်ရေးတပ်မတော် မြိတ်ခရိုင် တပ်ရင်း(၁)နဲ့ မဟာမိတ်အဖွဲ့တွေက ထမင်းမစားရွာမှာ တပ်စွဲထားတဲ့ စစ်ကောင်စီရဲ့ စစ်ဆေးရေးဂိတ်ကို နန်းထိုက်အောင်စစ်ဆင်ရေးအဖြစ် သွားရောက်ပစ်ခတ်တိုက်ခိုက်ခဲ့ပြီးနောက် အိမ်မီးရှို့ခံရတာ ဖြစ်ပါတယ်။

မီးရှို့ခံရတဲ့အိမ်ဟာ စစ်ကောင်စီဂိတ်ရဲ့ အနောက်ဘက်နားမှာရှိတဲ့ ဒေသခံ PDF တပ်ဖွဲ့ဝင်ကိုသန့်ဇင်ဦးရဲ့ နေအိမ်ဖြစ်တယ်လို့  ဒေသခံတစ်ဦးက ပြောပါတယ်။

ထမင်းမစားရွာမှာ ချိတ်ပိတ်ခံထားရတဲ့နေအိမ် ၄ အိမ်စလုံးဟာ  PDF တပ်ဖွဲ့ဝင် ကိုသန့်ဇင်ဦးရဲ့ မောင်နှမတွေရဲ့ အိမ်တွေဖြစ်ပြီး မိဘတွေကအစ အားလုံး PDF ထဲမှာဖြစ်တယ်ပါတယ်။

အဆိုပါနေအိမ်ကို စစ်ကောင်စီတပ်က ကိုယ်တိုင်မီးရှို့ခဲ့တာမဟုတ်ဘဲ စစ်ကောင်စီတပ်ရဲ့ လက်ပါးစေ  ရွာခံပျူစောထီးတပ်ဖွဲ့ဝင်တွေက  (ယခင်အခေါ် - ကျေးရွာပြည်သူ့စစ်တပ်ဖွဲ့ဝင်များ)က မီးရှို့ဖျက်ဆီးလိုက်တာလို့ ရွာသားတွေက ပြောပါတယ်။

ပြည်သူ့ကာကွယ်ရေးတပ်မတော် မြိတ်ခရိုင် တပ်ရင်း(၁) ထုတ်ပြန်ချက်မှာတော့   နာရီဝက်လောက်ကြာ တိုက်ပွဲဖြစ်ပွားခဲ့ပြီး နေအိမ်သုံးအိမ်  မီးရှို့ခံခဲ့ရတယ် ဖော်ပြပါတယ်။ တိုက်ပွဲမှာ နှစ်ဖက်ထိခိုက်ကျဆုံးမှုမရှိဘူးလို့ ဒေသခံတွေက ပြောပါတယ်။

ထမင်းမစားရွာဟာ မြိတ်-ထားဝယ်ကားလမ်းမကြီးပေါ်က ပလောက်စစ်တပ်နဲ့ ပုလောစစ်တပ်နှစ်ခုကြားတည်ရှိပြီး အရင်တုန်းကလည်း တိုက်ပွဲတွေဖြစ်ပွားခဲ့ပါတယ်။