အမေရိကန်ဒုသမ္မတ ကမ်မလာ ဟားရစ်ဟာ စက်တင်ဘာ ၂၈ ရက်က ဂျပန်နိုင်ငံရဲ့ ဆီမီးကွန်ဒတ်တာနဲ့ ဆက်နွှယ်တဲ့ စီးပွားရေးလုပ်ငန်း အကြီးအကဲတွေနဲ့ တွေ့ဆုံခဲ့ပါတယ်။

ဘိုင်ဒင် အစိုးရအဖွဲ့ဟာ တရုတ်နိုင်ငံရဲ့ စျေးကွက်လွှမ်းမိုးမှု မြင့်တက်လာတာကို တန်ပြန်ဖို့အတွက် အမေရိကန်ရဲ့ ချစ်ပ်ထုတ်လုပ်ရေးကဏ္ဍကို မြှင့်တင်ဖို့ လုပ်ဆောင်လာတာပါ။

စက်မှုလုပ်ငန်းအတွက် ထောက်ပံ့ကြေး ဒေါ်လာ ၅၂ ဒသမ ၇ ဘီလီယံ ပေးဆောင်တဲ့ ဥပဒေတရပ်ကို သြဂုတ်လက အတည်ပြုပြီးနောက်မှာ အမေရိကန်ပြည်ထောင်စုအတွင်း ဆီမီးကွန်ဒတ်တာ ထုတ်လုပ်ရေးမှာ ရင်းနှီးမြှုပ်နှံသူတွေအတွက် အခုရရှိနိုင်တဲ့ မက်လုံးပေးထားမှုတွေအကြောင်း ဟားရစ်က ပြောပြခဲ့ပါတယ်။

ကားတွေ၊ လက်နက်တွေ၊ အဝတ်လျှော်စက်တွေနဲ့ ဗီွဒီယိုဂိမ်းတွေ စတာတွေကနေ အရာအားလုံးကို ထုတ်လုပ်ရောင်းချရာမှာ အဟန့်အတားဖြစ်ရတဲ့ ချစ်ပ်ပြတ်လပ်မှုမျိုး မကြုံရအောင် ကူညီပေးဖို့ ရန်ပုံငွေဥပဒေကို ရေးဆွဲထားတယ်လို့ ဆိုပါတယ်။

ချစ်ပ် ပြတ်တောက်မှုတွေကြောင့် အမေရိကန်စားသုံးသူ ဈေးနှုန်းဖောင်းပွမှုကို ပိုဆိုးရွားစေခဲ့ပြီး ဩဂုတ်လမှာ နှစ်စဉ်ဖောင်းပွမှု အခြေခံ ၈ ရာခိုင်နှုန်း တက်လာခဲ့တာပါ။

ဂျပန်နိုင်ငံဟာ ဒီအလုပ်ကို လုပ်နိုင်စွမ်းနဲ့ ကြုံနေရတဲ့ စိန်ခေါ်မှုတွေကို ဖြေရှင်းရာမှာ အလွန်အရေးပါပြီး အရေးကြီးတဲ့ အခန်းကဏ္ဍကနေ ပါဝင်နေတာကို မြင်တွေ့ရကြောင်း ဟားရစ်က ပြောပါတယ်။

ဂျပန်နဲ့ အမေရိကန်တို့ဟာ ခံနိုင်ရည်ရှိတဲ့ ထောက်ပံ့ရေး ကွင်းဆက်တွေပေါ်မှာ အလုပ်လုပ်ကြဖို့နဲ့ တိုးတက်နေတဲ့ ဆန်းသစ်တီထွင်မှုမှာ ရင်းနှီးမြှုပ်နှံဖို့လည်း ကတိကဝတ် ပြုထားကြောင်း သူကဆိုပါတယ်။

ဒီတွေ့ဆုံပွဲမှာ တိုကျိုအီလက်ထရွန်၊ နိကွန်၊ ဟီတာချီ ဟိုက်တက်ခ် ကော်ပိုရေးရှင်းနဲ့ ဖူဂျစ်ဆု အပါအဝင် အနည်းဆုံး ကုမ္ပဏီ ၁၃ ခုက အမှုဆောင်အရာရှိတွေ တက်ရောက်ခဲ့ကြောင်း အိမ်ဖြူတော် တာဝန်ရှိသူတယောက်က ပြောပါတယ်။