ဖင်လန်နိုင်ငံက အဓိကအဝေးပြေးလမ်းမကြီးတွေထဲက အပိုင်းတပိုင်းကို ဆယ်စုနှစ်တွေအတွင်း ပထမဆုံးအကြိမ်အဖြစ် ငါးရက်ကြာ ပိတ်ပစ်ခဲ့ပြီး အရန်လေယာဉ်ပြေးလမ်းအဖြစ် အဲ့ဒီလမ်းပိုင်းတွေပေါ်မှာ တိုက်လေယာဉ်တွေက ဆင်းသက်တာနဲ့ ပျံသန်းတာတွေ လေ့ကျင့်ခဲ့ပါတယ်။

အိမ်နီးချင်း ရုရှားက ယူကရိန်းကို ကျူးကျော်ပြီးတဲ့နောက် နေတိုးအဖွဲ့ဝင်အဖြစ် လျှောက်ထားနေတဲ့ နော်ဒစ်ဒေသတွင်းနိုင်ငံ ဖင်လန်မှာ နိုင်ငံတဝန်း စစ်အတွင်းသုံးဖို့ ပုံစံထုတ်ထားတဲ့ အလားတူ အရန်ပြေးလမ်း ဒါဇင်များစွာ ရှိနေပါတယ်။

ဒါပေမဲ့ ဖင်လန်နိုင်ငံအလယ်ပိုင်း၊ ဂျိုးဆာဒေသမှာရှိတဲ့ အရန်လမ်းအခြေစိုက်စခန်းကတော့  မြို့တော် ဟယ်စင်ကီကို နိုင်ငံရဲ့ မြောက်ပိုင်းဒေသတွေနဲ့ ဆက်သွယ်ပေးတဲ့ အဓိက အဝေးပြေးလမ်းမကြီးအဖြစ် အရေးပါနေလို့ ဆယ်စုနှစ်များစွာကြာအောင် လေယာဉ်ပြေးလမ်း အဖြစ် မသုံးရသေးပါဘူး။

လေတပ်က လမ်းဘေးတွေကို ရှင်းဖို့နဲ့ လေ့ကျင့်ရေး ပြင်ဆင်ဖို့ ရက်နည်းနည်းသာ အချိန်ရခဲ့တာပါ။

လေ့ကျင့်ခန်းအတွက် ဝန်ထမ်းအယောက် ၂၀၀ လောက် ဖင်လန်နိုင်ငံထုတ် F/A-18 Hornet တိုက်လေယာဉ်တွေ၊ Hawk Mk 51 လေ့ကျင့်ရေးလေယာဉ်အဟောင်းတွေနဲ့ တခြား စစ်လေယာဉ်တွေ ပါဝင်လေ့ကျင့်ခဲ့တယ်လို့ ဖင်လန် လေကြောင်းတက္ကသိုလ်ရဲ့ အကြီးအကဲ ဗိုလ်မှူးကြီး ဗေဆာ မန်သီလာက ပြောပါတယ်။

ရေတပ်သင်္ဘောစုကို ကာကွယ်ဖို့ ဖင်လန်လေတပ်ဟာ နိုင်ငံတဝန်းက သူ့လေယာဉ်အားလုံးကို အမြန်အုပ်စုခွဲဖို့ လမ်းအခြေစိုက် စခန်းတွေမှာ နှစ်စဉ် အစမ်းလေ့ကျင့်ခဲ့ပါတယ်။