အီရန်အစိုးရဟာ ရုရှားကို မြေပြင်ကနေ နောက်ထပ် ဒရုန်းတွေအပြင် မြေပြင်ပစ် ဒုံးကျည်တွေ ထောက်ပံ့ပေးဖို့ ကတိပြုထားပြီးပြီလို့ အီရန် အကြီးတန်းအရာရှိနှစ်ယောက်နဲ့ အီရန်သံတမန် နှစ်ယောက်ရဲ့ ပြောဆိုချက်ကို ကိုးကားပြီး ရိုက်တာသတင်းဌာနက အောက်တိုဘာ ၁၈ ရက်မှာ ဖော်ပြပါတယ်။

ဒါဟာ အမေရိကန်နဲ့ တခြား အနောက်အင်အားကြီးနိုင်ငံတွေကို ဒေါသထွက်စေမယ့် လုပ်ရပ်ဖြစ်ပြီး လက်နက်တွေ သယ်ပို့ရေး အီရန်ရဲ့ ဒုသမ္မတ မိုဟာမဒ်မို့ခ်ဘာနဲ့ သြဇာကြီးတဲ့ အီရန်တော်လှန်ရေးအစောင့်တပ်က အကြီးတန်းအရာရှိနှစ်ယောက်၊ အမျိုးသားလုံခြုံရေးကောင်စီက အကြီးတန်းအရာရှိတယောက်တို့ဟာ ရုရှားနဲ့ဆွေးနွေးဖို့ မော်စကိုကို သွားခဲ့ပြီး အောက်တိုဘာ ၆ ရက်က သဘောတူညီချက်တခု ရခဲ့ပါတယ်။

“ရုရှားတွေဟာ ဒရုန်းတွေနဲ့ ပိုတိကျတဲ့ အီရန်ပဲ့ထိန်းဒုံးကျည်တွေ၊ အထူးသဖြင့် ဖာတာနဲ့ ဇိုဖေဂါ ဒုံးပျံအမျိုးအစား ပိုများများရဖို့ တောင်းဆိုခဲ့ပါတယ်”လို့ အီရန်သံတမန်တယောက်က ခရီးစဉ်နဲ့ပတ်သက်ပြီး ရှင်းလင်းပြောပြခဲ့ပါတယ်။

ဇိုဖေဂါ အပါအဝင် မြေပြင်မှ မြေပြင်ပစ် တာတိုပစ်ပဲ့ထိန်းဒုံးကျည်တွေ ပေးဖို့ အီရန်နဲ့ ရုရှားကြား သဘောတူညီချက်ရထားတယ်လို့ အနောက်တိုင်း အရာရှိတယောက်က အတည်ပြု ပြောဆိုပါတယ်။

ဒီလက်နက်လွှဲပြောင်းမှုဟာ ၂၀၁၅ ခုနှစ် ကုလသမဂ္ဂ လုံခြုံရေးကောင်စီရဲ့ ဆုံးဖြတ်ချက်ကို ချိုးဖောက်တယ်ဆိုတဲ့ အနောက်နိုင်ငံအရာရှိတွေရဲ့ ပြောဆိုမှုကို အီရန်သံတမန်က ပယ်ချခဲ့ပါတယ်။

မကြာသေးမီ သီတင်းပတ်တွေအတွင်း အီရန်လုပ် ရှဟိဒ် ၁၃၆ ဒရုန်းတွေသုံးပြီး ရုရှားက တိုက်ခိုက်ခဲ့တယ်လို့ ယူကရိန်းက ကြေညာခဲ့တာပါ။

ရုရှားနိုင်ငံဆီ ဒရုန်းတွေကို အီရန်က မပေးထားဘူးလို့ ငြင်းဆိုခဲ့ပြီး ရုရှားအစိုးရက သူ့တပ်ဖွဲ့တွေဟာ ယူကရိန်းကိုတိုက်ခိုက်ဖို့ အီရန်ဒရုန်းတွေကို မသုံးခဲ့ဘူးလို့  ငြင်းဆိုခဲ့ပါတယ်။