နှစ်စဉ်ကျင်းပနေကျ လွှိုင်ကထုံ ထိုးရိုးရာပွဲတော်မှာ ပါဝင်ဆင်နွှဲဖို့ ထောင်နဲ့ချီတဲ့ ကမ္ဘာလှည့်ခရီးသည်တွေဟာ ထိုင်းနိုင်ငံမြောက်ပိုင်း ချင်းမိုင်မြို့ကို  နိုဝင်ဘာ ၈ ရက်က စုပြုံရောက်လာခဲ့ပါတယ်။

ဒီပွဲဟာ ထိုင်းနိုင်ငံရဲ့ မီးမျှောပွဲတော်ဖြစ်ပြီး နိုင်ငံအတွင်း လွိုင်ကထုံပွဲတော်လို့ လူသိများပါတယ်။ အခုနှစ်မှာ ကမ္ဘာတဝန်းက လာရောက်လည်ပတ်သူ အယောက် ၈,၀၀၀ လောက်ရှိပြီး အမြင့်ဆုံးအရေအတွက် မဟုတ်သေးဘူးလို့ ပွဲစီစဉ်သူက ဆိုပါတယ်။

ဘရာဇီးနိုင်ငံကနေ လာရောက်လည်ပတ်တဲ့ အသက် ၃၁ နှစ်အရွယ် ခရီးသည်က “ကောင်းကင်ယံမှာ မီးပုံးတွေမြင်ရဖို့က အိပ်မက်ကြီးတခုပါ။ ဒါကြောင့်မို့ ကျနော်တို့ ဒီကိုရောက်နေပြီး ဒါဟာ ယဉ်ကျေးမှုပွဲတော်ကြီးတခုလို့ ကျနော်ထင်ပါတယ်။ ကြိုက်တယ်” လို့  ပြောပါတယ်။

ထိုင်းမြောက်ပိုင်း ရိုးရာဓလေ့အရ ထိုင်းပြက္ခဒိန်ရဲ့ ၁၂ လမြောက် လပြည့်နေ့မှာ ငှက်ပျောပင်စည်တွေကို ခုတ်ပိုင်းပြီး ပန်းတွေ၊ ဖယောင်းတိုင်တွေနဲ့ အလှဆင်ယင်ထားတဲ့ မီးဖောင်တွေကို မြစ်ထဲ ရေကန်ထဲ မျှောချလေ့ရှိပါတယ်။ ဒါဟာ ကံဆိုးခြင်းတွေကို ရေထဲမျှောချပြီး ရေစောင့်နတ်သမီး၊ မြစ်စောင့်နတ်သမီးတို့ကို ခွင့်လွှတ်ဖို့ တောင်းပန်တဲ့ အထိမ်းအမှတ်လည်း ဖြစ်ပါတယ်။

တန်ဆောင်မုန်းလပြည့်ညမှာ မီးပုံးလွှတ်တာဟာ ကံဆိုးခြင်းကနေ လွတ်ကင်းပြီး လာမယ့်နှစ်မှာ ကံကောင်းခြင်းတွေကို ကြိုဆိုတဲ့သင်္ကေတ ဖြစ်ပါတယ်။