အမေရိကန်သမ္မတ ဂျိုးဘိုင်ဒင်က တွစ်တာပိုင်ရှင် အီလွန်မတ်စ်ခ်နဲ့ တခြားနိုင်ငံတွေရဲ့ ဆက်ဆံရေးဟာ စောင့်ကြည့်ခံထိုက်တယ်လို့ ယူဆကြောင်း နိုဝင်ဘာ ၉ ရက်မှာ ပြောလိုက်ပါတယ်။

“အီလွန်မတ်စ်ခ်ရဲ့ ပူးပေါင်းဆောင်ရွက်မှုနဲ့ တခြားနိုင်ငံတွေနဲ့ နည်းပညာပိုင်းဆိုင်ရာ ဆက်ဆံရေးတွေကို ကြည့်ရှုဖို့ ထိုက်တန်တယ်လို့ ကျနော်ထင်ပါတယ်။ သူလုပ်တာက သင့်တော်တာပဲဖြစ်ဖြစ်၊ အဲဒါကို အကြံပေးတာ မဟုတ်ဘူး။ သူတို့ကို စောင့်ကြည့်သင့်တယ်လို့ အကြံပေးတာပါ” လို့ ဘိုင်ဒင်က ပြောခဲ့ပါတယ်။

အီလွန်မတ်စ်ခ်ဟာ နိုင်ငံတော်လုံခြုံရေးကို ခြိမ်းခြောက်မှုလို့ ထင်သလား ဆိုတာနဲ့ ဆော်ဒီအာရေဗျ လုပ်ငန်းစုကြီးတခုဆီက အကူအညီနဲ့ တွစ်တာကို ဝယ်တာဟုတ်မဟုတ် အမေရိကန်အစိုးရက စုံစမ်းစစ်ဆေးသင့်တယ်လို့ ထင်သလားဆိုတဲ့ မေးခွန်းတွေအတွက် ဘိုင်ဒင်က  တုံ့ပြန်ဖြေဆိုခဲ့တာပါ။

အီလွန်မတ်စ်ခ်ဟာ တွစ်တာကို ဝယ်ပြီးတဲ့နောက်မှာ ထိပ်တန်းအမှုဆောင်တွေကို အလုပ်ထုတ်ခဲ့ပါတယ်။

အီလွန်မတ်စ်ခ်ဟာ သြဇာကြီးတဲ့ လူမှုကွန်ရက် ဆိုရှယ်မီဒီယာ ပလက်ဖောင်းအတွက် သူ့ရည်မှန်းချက်တွေကို အောင်မြင်အောင် ဘယ်လိုလုပ်မလဲ ဆိုတာကိုတော့ အနည်းငယ်ပဲ ရှင်းပြခဲ့ပါတယ်။