ဗြိတိန်ဝန်ကြီးချုပ်သစ် ရိရှိ ဆူနပ်ခ်ဟာ နိုဝင်ဘာ ၁၉ ရက်မှာ ယူကရိန်းမြို့တော် ကိယက်ဗ်မြို့ဆီ ပထမဆုံး လာရောက်လည်ပတ်ခဲ့ပြီး သူ အရင်တည်းက အာရုံစိုက်ခဲ့တဲ့ ယူကရိန်းနိုင်ငံအတွက် ခိုင်ခိုင်မာမာ ဆက်ပြီး ပံ့ပိုး ကူညီသွားမယ်၊ ရုရှား မောင်းသူမဲ့လေယာဉ်တွေကို ပစ်ချရာမှာ ကူညီဖို့ လေကြောင်းရန်ကာကွယ်ရေး အစီအစဉ်သစ်တခု ပံ့ပိုးပေးမယ်လို့ ကတိပြုခဲ့ပါတယ်။

ဆူနပ်ခ်ရဲ့ခရီးစဉ်အတွင်း ဗြိတိန်ဟာ လေယာဉ်ပစ်သေနတ် အလက် ၁၂၀၊ ရေဒါနဲ့ မောင်းသူမဲ့ လေယာဉ် ဆန့်ကျင်ရေး ကိရိယာတွေအပါအဝင် လေကြောင်းရန် ကာကွယ်ရေး အထောက်အပံ့ အသစ်တွေ ပံ့ပိုးပေးမယ်လို့ ဆူနပ်ခ်က ပြောခဲ့ပါတယ်။ 

ယူကရိန်းလက်နက်ကိုင်တပ်ဖွဲ့တွေကို လေ့ကျင့်ပေးမယ့် သင်တန်းတွေကိုလည်း တိုးမြှင့်သွားမယ် လို့ ဝန်ကြီးချုပ်က ပြောပါတယ်။ 

ပူးတွဲသတင်းစာ ရှင်းလင်းပွဲမှာ ယူကရိန်းသမ္မတ ဇလန်းစကီးက ယူကရိန်းအပေါ် ရုရှားဒုံးကျည်နဲ့ ပစ်ခတ်တိုက်ခိုက်မှုနဲ့ ပတ်သက်ပြီး ပြောခဲ့ပါတယ်။

ခုအချိန်အထိ ယူကရိန်းစွမ်းအင် အခြေခံအဆောက်အအုံတွေရဲ့ ထက်ဝက်လောက် ပျက်စီးခဲ့ပြီး ရုရှားဟာ လျှပ်စစ်ဓာတ်အားသာမက ဓာတ်ငွေ့အခြေခံအဆောက်အအုံတွေကိုပါ စပြီး တိုက်ခိုက် နေပြီလို့ ဇလန်းစကီးက ပြောပါတယ်။

ဘဏ္ဍာရေးဝန်ကြီးဟောင်း ဆူနပ်ခ်ဟာ လစ်ဇ်ထရပ်စ် သက်တမ်းတို ၀န်ကြီးချုပ်ဖြစ်ပြီးတဲ့နောက် ပြီးခဲ့တဲ့လက ဝန်ကြီးချုပ် ရာထူးကို ရလာတာပါ။

လစ်ဇ်ထရပ်စ်နဲ့ ဘောရစ်ဂျွန်ဆင်တို့ဟာ ဆူနပ်ခ် ကတိကဝတ်ပြုထားတဲ့ အစီအစဉ်ရဲ့ အရေးကြီး တဲ့ အစိတ်အပိုင်းတစ်ခုဖြစ်တဲ့ ယူကရိန်းအတွက် လူသိရှင်ကြား ထောက်ခံထားပါတယ်။

အနောက်နိုင်ငံတွေက ယူကရိန်းကို ပံ့ပိုးထားတဲ့ လေကြောင်းရန် ကာကွယ်ရေးစနစ်တွေကို ကျော်ဖို့ ပြီးခဲ့တဲ့လက စပြီး ရုရှားဟာ အီရန်နိုင်ငံလုပ် မောင်းသူမဲ့ လေယာဉ်တွေကို အသုံးပြုခြင်း အပါအဝင် တာဝေးပစ် တိုက်ခိုက်မှုတွေနဲ့ ယူကရိန်း စွမ်းအင်အခြေခံ အဆောက်အအုံတွေကို ပိုပစ်မှတ်ထား တိုက်ခိုက်ခဲ့ပါတယ်။