အင်ဒို-ပစိဖိတ်ဒေသ လွတ်လပ်မှုရရှိစေဖို့အတွက် ဂျပန်နိုင်ငံနဲ့ လုံခြုံရေးပူးပေါင်းဆောင်ရွက်မှုကို နက်နက်ရှိုင်းရှိုင်း လုပ်ဆောင်မယ်လို့ ထိုင်ဝမ်သမ္မတ ဆိုင်အင်းဝမ်က ဂျပန်အာဏာရ လစ်ဘရယ် ဒီမိုကရက်တစ်ပါတီ (LDP) ရဲ့ မူဝါဒရေးရာအကြီးအကဲ ကိုအိချိ ဟာ့ဂီယူဒါ့နဲ့ တွေ့ဆုံချိန်မှာ ကတိပြု ပြောကြားလိုက်ပါတယ်။ 

ထိုင်ပေရှိ သမ္မတရုံးမှာ ဒီဇင်ဘာ ၁၀ ရက်က တွေ့ဆုံခဲ့ချိန်မှာ သမ္မတ ဆိုင်က “အနာဂတ်မှာ ထိုင်ဝမ်ဟာ လုံခြုံရေးစတဲ့ နယ်ပယ်အသီးသီးမှာ ဂျပန်နဲ့ ပူးပေါင်းဆောင်ရွက်မှုကို နက်နက်ရှိုင်းရှိုင်း ဆက်လက်ဆောင်ရွက်သွားမှာဖြစ်ပြီး အင်ဒို-ပစိဖိတ်ဒေသရဲ့ လွတ်လပ်မှု၊ ပွင့်လင်းမှုနဲ့ တည်ငြိမ်မှု ရရှိစေဖို့ အတူတကွ ပူးပေါင်းလုပ်ဆောင်သွားမှာဖြစ်တယ်”လို့ ပြောပါတယ်။ 

ထိလွယ်ရှလွယ် ထိုင်ဝမ်ရေလက်ကြားမှာ လုံခြုံရေးထိန်းသိမ်းခြင်းလို ကိစ္စရပ်တွေအတွက် ဂျပန်နိုင်ငံရဲ့ ပံ့ပိုးကူညီမှုအတွက် သမ္မတ ဆိုင်က ကျေးဇူးတင်ရှိခဲ့ပါတယ်။ 

ထိုင်ဝမ်နဲ့ ဂျပန်နိုင်ငံတို့ဟာ တရားဝင် သံတမန်ဆက်ဆံရေး မရှိပေမဲ့  သူတို့မှာ ရင်းနှီးတဲ့ အလွတ်သဘော ဆက်ဆံရေး ရှိထားတာပါ။  အထူးသဖြင့် သူတို့နဲ့ အနီးနားမှာ စစ်ရေးလှုပ်ရှားမှုတွေကို တိုးမြှင့်ထားတဲ့ တရုတ်နဲ့ပတ်သက်ပြီး စိုးရိမ်မှုတွေကို မျှဝေကြတာပါ။ 

ဟာ့ဂီယူဒါ့ ဟာ ဒီဇင်ဘာ ၁၁ ရက်မှာ ကျင်းပတဲ့ ထိုင်ပေ-ဂျပန် ဆက်ဆံရေး ဖိုရမ်ကို တက်ရောက်ဖို့ ထိုင်ပေမြို့မှာ ရောက်ရှိနေတာဖြစ်ပြီး မစ္စတာ ဒီမိုကရေစီလို့ အမည်တွင်ထားတဲ့ ဂျပန်ပညာတတ် သမ္မတဟောင်း လီတမ်ဟွေရဲ့ အုတ်ဂူကိုလည်း သွားရောက် ဂါရဝပြုမှာဖြစ်ပါတယ်။

ပေကျင်းဟာ ထိုင်ဝမ်ကျွန်းမှာ သူ့ရဲ့အချုပ်အခြာအာဏာကို အခိုင်အမာ စိုက်ထူနိုင်ဖို့ လုပ်ဆောင်နေချိန်မှာ ဂျပန်ကလည်း ထိုင်ဝမ်အပေါ် တရုတ်ရဲ့ စစ်လိုလားနေမှုကို စိုးရိမ်တကြီး စောင့်ကြည့်နေတာဖြစ်ပါတယ်။