ပီရူးကာကွယ်ရေးဝန်ကြီးဟာ ဒီဇင်ဘာ ၁၄ ရက်က နိုင်ငံတဝန်း အရေးပေါ်အခြေအနေ ကြေညာခဲ့တာကြောင့် ဆန္ဒပြသူတွေက ကွန်ဂရက်လွှတ်တော်ဖျက်သိမ်းဖို့နဲ့ သမ္မတသစ်  ဒီနာဘိုလူအာတာ နုတ်ထွက်ပေးဖို့ တောင်းဆိုနေပြီး နိုင်ငံအနှံ့အပြားမှာ မငြိမ်သက်မှုတွေ ဆက်လက် ဖြစ်ပွားနေပါတယ်။

ပီရူးတောင်ပိုင်း ဆန်ရိုမန်ပြည်နယ် ဟူလီယာကာမြို့မှာ ဆန္ဒပြသူတစုဟာ  အပြည်ပြည်ဆိုင်ရာလေဆိပ်ရဲ့ ဂိတ်တံခါးကို ဖြိုခွင်းဝင်ရောက်ပြီးတော့ လုပ်ငန်းတွေကိုလည်း ပိတ်ခိုင်းခဲ့ကြောင်း ရဲတပ်ဖွဲ့က သတင်းထုတ်ပြန်ခဲ့ပါတယ်။

ကာကွယ်ရေးဝန်ကြီး အယ်လ်ဘာတိုအိုတဲရိုလာက “ဆူပူမငြိမ်သက်မှုတွေနဲ့ အကြမ်းဖက်မှုတွေကြောင့် နိုင်ငံတဝန်း အရေးပေါ်အခြေအနေကြေညာဖို့ သဘောတူညီခဲ့ကြောင်း” သတင်းထောက်တွေကို ပြောပါတယ်။

သီတင်းတပတ်ကြာ ဆန္ဒပြမှုတွေနဲ့ လမ်းပိတ်ဆို့မှုတွေ ဖြစ်ပွားပြီးနောက် အရေးပေါ် အခြေအနေအရ စစ်သားတွေကို ပြည်သူတွေရဲ့ လုံခြုံရေး ထိန်းသိမ်းရာမှာ ရဲတပ်ဖွဲ့ဝင်တွေကို ကူညီဆောင်ရွက်ပေးဖို့ ခွင့်ပြုမှာဖြစ်ပါတယ်။

ရဲတပ်ဖွဲ့နဲ့ ရုန်းရင်းဆန်ခတ် ဖြစ်ခဲ့ရာမှာ ဆယ်ကျော်သက်တွေ အများစုပါဝင်တဲ့ လူ ၆ ဦး သေဆုံးခဲ့ကြောင်း အာဏာပိုင်တွေက ပြောကြားခဲ့ပြီး သူတို့အားလုံးဟာ သေနတ်နဲ့ပစ်ခတ်ခံခဲ့ကြရတာလို့ လူ့အခွင့်အရေးအဖွဲ့တွေက ပြောပါတယ်။

ဆန္ဒပြသူတွေဟာ အဝေးပြေးလမ်းတွေကို ပိတ်ဆို့ထားပြီး အဆောက်အဦတွေကို မီးရှို့ကာ လေဆိပ်တွေထဲကို ကျူးကျော်ဝင်ရောက်ခဲ့ကြပါတယ်။

“သူတို့က ပြည်သူတွေရဲ့အသံကို ပိတ်ထားချင်ပေမဲ့ ပြည်သူတွေကတော့ ဆန္ဒပြပွဲတွေမှာ ဆက်ရှိနေမယ်၊ ကျဆုံးသွားတဲ့ ညီအစ်ကိုအားလုံးအတွက် ဆက်လက်တိုက်ပွဲဝင်သွားမှာပါ” လို့ လီမာမြို့က ဆန္ဒပြပွဲအတွင်း သမ္မတဟောင်း  ပီဒရိုကတ်စတီလိုကို ထောက်ခံသူ အယ်လီယာဇာ ဂါလ်ဗက်ဇ်က ပြောကြားခဲ့ပါတယ်။

ဖမ်းဆီးခံထားရတဲ့ သမ္မတဟောင်း ကက်စတီလိုကတော့  ပုန်ကန်မှုနဲ့ ပူးပေါင်းကြံစည်မှုတွေနဲ့ စွဲချက်တင်ခံထားရပါတယ်။