၂၀၁၆ ခုနှစ်အတွက် အကောင်းဆုံးနိုင်ငံခြားဘာသာစကားပြော အော်စကာဆုရဇာတ်ကား "The Salesman" မှာ ပါဝင်သရုပ်ဆောင်ခဲ့တဲ့ နာမည်ကြီးမင်းသမီး တာရာနာ-အလီဒူစတာကို ဒီဇင်ဘာ ၁၇ ရက်မှာ အီရန်အာဏာပိုင်တွေက ဖမ်းဆီးထိန်းသိမ်းခဲ့ပါတယ်။ 

ဒီမင်းသမီးဟာ အစိုးရကိုဆန့်ကျင်တဲ့ ဆန္ဒပြပွဲတွေအပေါ် ထောက်ခံ ပြောဆိုခဲ့ပြီးတဲ့နောက် အခုလို ဖမ်းဆီးခံခဲ့ရတာပါ။

သူဟာ နိုဝင်ဘာ ၉ ရက်ကလည်း လမ်းပေါ်ထွက် ဆန္ဒပြတောင်းဆိုသူတွေရဲ့ အဓိက ဆောင်ပုဒ်ဖြစ်တဲ့ "အမျိုးသမီး၊ သက်ရှိဘဝ၊ လွတ်လပ်မှု" လို့ ရေးသားထားတဲ့ ကတ်ထူ စက္ကူတစ်ခုကို ကိုင်ဆောင်ရင်း ခေါင်းစည်းပုဝါမပါတဲ့ သူရဲ့ဓာတ်ပုံကို အင်စတာဂရမ်မှာ တင်ခဲ့တာပါ။ 

“အလီဒူစတာ ဟာ သူရဲ့တောင်းဆိုချက်အချို့ပေါ်မှာ လိုအပ်တဲ့ စာရွက်စာတမ်း အထောက် အထား မတင်ပြတာကြောင့် ပြီးခဲ့တဲ့ နာရီပိုင်းကပဲ တရားရေးအာဏာပိုင်တွေရဲ့ အမိန့်အရ ဖမ်းဆီခဲ့တယ်” လို့  နိုင်ငံပိုင်သတင်းအေဂျင်စီ IRNA က တရားစီရင်မှုဆိုင်ရာ ထုတ်ပြန်ချက်ကို ကိုးကား ဖော်ပြခဲ့ပါတယ်။ 

၂၀၂၀ ပြည့်နှစ်တုန်းကလည်း ဟီဂျပ် သို့မဟုတ် အစ္စလာမ်မစ် ဝတ်စားဆင်ယင်မှုဆိုင်ရာ ဥပဒေကို အတင်းအကျပ် လိုက်နာစေချင်တဲ့ ကျင့်ဝတ်ထိန်း ရဲတပ်ဖွဲ့ကို အလီဒူစတာက တွစ်တာမှာ ဝေဖန်ခဲ့တာကြောင့် ဆိုင်းငံ့ထောင်ဒဏ် ၅ လ ချမှတ်ခံခဲ့ရပါသေးတယ်။ 

အလီဒူစတာဟာ ပြီးခဲ့တဲ့ သုံးလအတွင်း ဆန္ဒပြပြည်သူတွေကို လုံခြုံရေးအရ အကြမ်းဖက် ဖြိုခွင်းမှုအပေါ် ဆန့်ကျင်ပြောဆိုမှုကြောင့် ဖမ်းဆီး ထိန်းသိမ်းခံရတဲ့ အနုပညာရှင်၊ ဂျာနယ်လစ်၊ ရှေ့နေစတဲ့ ဒါဇင်ပေါင်းများစွာထဲက နောက်ဆုံး တစ်ဦးဖြစ်ပြီး တချို့ကတော့ အာမခံနဲ့အတူ လွတ်မြောက်ခဲ့ ပါတယ်။ 

စက်တင်ဘာ ၁၆ ရက်က အီရန်နိုင်ငံရဲ့ တင်းကျပ်တဲ့ အစ္စလာမ်မစ်ဝတ်စားဆင်ယင်မှု စည်းမျဉ်းအောက်မှာ "မသင့်လျော်တဲ့ အဝတ်အစား" ဝတ်ဆင်မှုကြောင့်ဆိုပြီး ကျင့်ဝတ်ထိန်း ရဲ တွေက အသက် ၂၂ နှစ်အရွယ် မာရှာအာမာနီကို ဖမ်းဆီးထိန်းသိမ်းခဲ့ရာကနေ သေဆုံးခဲ့ရတာ ကြောင့် နောက်ဆက်တွဲ ဖြစ်ပေါ်လာတဲ့ လက်ရှိဆန္ဒပြအုံကြွမှုတွေဟာ အီရန်နိုင်ငံကို ကိုင်လှုပ်နေပါပြီ။ 

ဒီဆန္ဒပြ တောင်းဆိုမှု တွေဟာ ၁၉၇၉ ခုနှစ် အစ္စလာမ်မစ်တော်လှန်ရေးနောက်ပိုင်း အီရန်နိုင်ငံမှာ အကြီးမားဆုံးစိန်ခေါ်မှုတစ်ရပ် ဖြစ်လာခဲ့ ပါတယ်။