KNU တပ်မဟာ ၆ နယ်မြေ၊ ကရင်ပြည်နယ် ဘုရားသုံးဆူလမ်းက တောင်စွန်း နယ်ခြားစောင့်တပ်ဖွဲ့ (BGF) စခန်းကို KNLA က ဒီနေ့မနက် သိမ်းလိုက်ပြီလို့ KNU တပ်မဟာ ၆ သတင်းအရင်းမြစ်က ပြောပါတယ်။

ဒီနေ့ မနက် ၃ နာရီလောက်မှာ BGF စခန်း ၃ ခုထဲမှ ၂ ခုကို လောလောဆယ် သိမ်းထားပြီး လက်နက်ခဲယမ်းတွေလည်း အများပြားရရှိကာ စစ်ကောင်စီလက်အောက်ခံတပ်တွေ အထိနာ အကျဆုံး များတယ်လို့ ကရင်အမျိုးသားအစည်းအရုံး (KNU) သတင်းအရင်းမြစ်တဦးက ပြောပါတယ်။ 

“တိုက်ပွဲက ပြင်းထန်လာခဲ့သလို နှစ်ဖက်စလုံးက အထိခိုက်အကျဆုံးတွေ ရှိကြပါတယ်။ စစ်ကောင်စီလက်အောက်ခံတပ်ဖွဲ့တွေ မြေပြင်မှာအထိနာလာတော့ လေကြောင်းပစ်ကူပါ လက်ရှိ ပေးနေခဲ့ရာမှာ ဒေသခံ ၄ ယောက် လေယာဥ် ဗုံးဆထိမှန်ထားခဲ့တယ်။”

ကရင်ပြည်နယ် ကော့ကရိတ်မြို့အနီးနားအပါအဝင် ဘုရားသုံးဆူအထိ ကျေးရွာတွေဘက်မှာ စစ်ကောင်စီတပ်နဲ့ ကရင်အမျိုးသားလွတ်မြောက်ရေးတပ်မတော် (KNLA)  ပူးပေါင်းမဟာမိတ်အဖွဲ့တွေကြား ၂ ပတ်ကြာ တိုက်ပွဲ ပြင်းထန်နေတာကြောင့်  စစ်ဘေးရှောင် ၁၅၀၀ ကျော်ဟာ အရေးပေါ်စားနပ်ရိက္ခာ၊ ဆေးဝါးနဲ့ နေရာထိုင်ခင်းတွေ လိုအပ်နေတယ်လို့ ဆိုပါတယ်။