ပီရူးနိုင်ငံအတွင်း မတည်မငြိမ် အခြေအနေကနေ ထွက်ပြေးရင်း မြစ်ကိုဖြတ်ကူးဖို့ ကြိုးပမ်းတဲ့  စစ်သား ၆ ယောက် ပြီးခဲ့တဲ့သီတင်းပတ်ကုန်ရက်က သေဆုံးခဲ့တယ်လို့ ပီရူးအရာရှိတွေက မတ်လ ၆ ရက်မှာ ပြောပါတယ်။

နိုင်ငံအတွင်း အစိုးရဆန့်ကျင်ရေး ဆန္ဒပြပွဲတွေ ပေါ်ပေါက်နေတာ ၃ လကြာပါပြီ။ အကျဉ်းကျခံနေရတဲ့ သမ္မတဟောင်း ပီဒရို ကတ်စတီလို လွတ်မြောက်ရေးနဲ့ သူ့ကိုဆက်ခံသူ ဒီနာ ဘိုလူအာတာ သမ္မတအဖြစ်ကနေ နုတ်ထွက်ပေးရေး တောင်းဆိုတဲ့ အပြင်းထန်ဆုံး ဆန္ဒပြပွဲတွေတည်ရှိရာ ပူနိုဒေသတောင်ပိုင်းက မြစ်တခုကို ဖြတ်ကူးဖို့ ကြိုးစားရင်း စစ်သားတွေ မတ် ၅ ရက်က ပျောက်ဆုံးသွားခဲ့တာပါ။

ဒေသတွင်း လုံခြုံရေးစစ်ဆင်ရေးတွေ အားဖြည့်ဖို့ ကြိုးပမ်းနေတုန်း စစ်သားတွေကို ဆန္ဒပြသူတွေက တိုက်ခိုက်ခဲ့တယ်လို့ တာဝန်ရှိသူတွေက ပြောပါတယ်။

မတ် ၅ ရက်နေ့ စစ်တပ်ရဲ့ ထုတ်ပြန်ချက်အရ စစ်သားတွေဟာ မြစ်ကိုဖြတ်ကူးရင်း “အစားထိုးလမ်းကြောင်းတခု” ကနေ သွားဖို့ ဆုံးဖြတ်ခဲ့ကြပေမဲ့ ရေစီးကြောင်းကြောင့် မျောပါသွားတယ်လို့ ဆိုပါတယ်။

ကတ်စတီလို ရာထူးကနေ ဖြုတ်ချခံရပြီးကတည်းက ပီရူးနိုင်ငံအတွင်း ပူနိုဒေသအပါအဝင် နေရာအနှံ့မှာ လူဒါဇင်ပေါင်းများစွာ သေဆုံးခဲ့တဲ့ ဆန္ဒပြလှုပ်ရှားမှုကို မချေမှုန်းနိုင်သေးပါဘူး။