ထိုင်းနိုင်ငံမှာ လာမယ့် မတ်လ ၁၂ မှ ၁၄ ရက်နေ့တွေအတွင်း အပူပိုင်းမုန်တိုင်းဝင် ရောက်လာဖွယ်ရှိကြောင်း ထိုင်းမိုးလေဝသနဲ့ ဇလဗေဒဌာနက သတိပေးထုတ်ပြန်ထားပါတယ်။ 

ဒီကနေ့ မတ်လ ၉ ရက် မနက် ၅ နာရီထုတ်ပြန်ချက်အရ တရုတ်နိုင်ငံကလေဖိအားနည်းရပ်ဝန်းဟာ ထိုင်းနိုင်ငံမြောက်ပိုင်းနဲ့ တောင်တရုတ်ပင်လယ်ပြင်ထိရွှေ့လျားလာပြီး အပူချိန်မြင့်မားလာမှာဖြစ် ကြောင်း၊ မနက်ပိုင်းမှာ အေးပြီး နေ့လယ်ပိုင်းမှာ ပူပြင်းတဲ့အခြေအနေတွေကြောင့်  ထိုင်းမြောက်ပိုင်း၊ အရှေ့မြောက်ပိုင်း၊ အလယ်ပိုင်း၊ အရှေ့ပိုင်းနဲ့ ဘန်ကောက်အနီးတဝိုက်မှာ နွေရာသီမုန် တိုင်းဝင်ရောက်နိုင်ဖွယ်ရှိတယ်လို့ ခန့်မှန်းထားပါတယ်။ 

ဒီမုန်တိုင်းကြောင့် မတ်လ ၁၂ ရက် ညပိုင်းကစ ၁၄ ရက်နေ့ထိ မိုးထစ်ချုန်းရွာ၊  မိုးသီးကြွေ၊ မိုးကြိုးပစ်၊ လေပြင်းတိုက်ခြင်းတွေဖြစ်ပေါ်နိုင်ကြောင်း၊ ဒါကြောင့် သစ်ပင်ကြီးတွေ၊ ခိုင်ခံ့မှု မရှိတဲ့ အဆောက်အဦတွေ၊ ဆိုင်းဘုတ်ကြီးတွေရဲ့ အနီးအနားနဲ့တကွ ကွင်းပြင်ကျယ်တွေကို ရှောင်ရှားသင့်ကြောင်း၊ တောင်သူတွေအနေနဲ့ မိမိတို့စိုက်ပျိုးသီးနှံ ပျက်စီးဆုံးရှုံးမှု နည်းပါးအောင် ကြိုတင်ပြင်ဆင်ကာကွယ်ထားသင့်တယ်လို့ အကြံပြုထားပါတယ်။

မတ်လ ၉ ရက်မှ ၁၁ ရက်အတွင်း အပူချိန်တွေမှာ ထိုင်းမြောက်ပိုင်းဒေသမှာ ၁၇ မှ ၃၈ ဒီဂရီစင်တီဂရိတ်၊ ထိုင်းအရှေ့မြောက်ပိုင်း အီဆန်ဒေသမှာ ၁၇ မှ ၃၅ ဒီဂရီစင်တီဂရိတ်၊ ထိုင်းအလယ်ပိုင်းမှာ ၂၁ မှ ၃၇ ဒီဂရီစင်တီဂရိတ်၊ ထိုင်းအရှေ့ပိုင်းမှာ ၂၁ မှ ၃၆ ဒီဂရီစင်တီဂရိတ်၊ ထိုင်းတောင်ပိုင်းမှာ ၂၁ မှ ၃၅ ဒီဂရီစင်တီဂရိတ် ၊ ဘန်ကောက်နဲ့ အနီးတဝိုက်ဧရိယာမှာ ၂၃ မှ ၃၇ ဒီဂရီစင်တီဂရိတ်ထိ ရှိမယ်လို့ ဆိုပါတယ်။ 

ထိုင်းပင်လယ်ပြင်မှာ လှိုင်းအမြင့် ၁ မီတာလောက်သာ မြင့်တက်မှာဖြစ်ပြီး ရာသီဥတု ကောင်းမွန်နေမယ်လို့ ဆိုပါတယ်။ 

မတ်လ ၁၄ ရက်နောက်ပိုင်း ထိုင်းမြောက်ပိုင်းဒေသမှာ အပူချိန်ကျဆင်းပြီး မီးခိုးမှုန်သိပ်သည်းမှုတွေ လျော့ပါးသွားမယ်လို့ ဆိုပါတယ်။ 

နွေရာသီမုန်တိုင်းသတိပေးချက်ကိုမတ်လ ၁၀ ရက် မနက် ၅ နာရီမှာ ထပ်မံထုတ်ပြန်မှာဖြစ်ကြောင်း၊ အများပြည်သူတွေအနေနဲ့ မိုးလေဝသ သတိပေး အချက်အလက်တွေကို ထိုင်းမိုးဇလဝက်ဘ်ဆိုက် https://www.tmd.go.th/ မှာ ဝင်ရောက်ကြည့်ရှုနိုင်သလို ဖုန်းနံပါတ် ၀၂ ၃၉၉၄၀၁၂ - ၁၃ ဒါမှမဟုတ် အရေးပေါ်လိုင်း ၁၁၈၂ ကို ၂၄ နာရီ ဆက်သွယ်နိုင်တယ်လို့ ထိုင်းသတင်းမှာ ရေးပါတယ်။ 

Source: Ch7