ရုရှားတပ်ဖွဲ့တွေဟာ ယူကရိန်းမြို့တော်၊  ကိယက်ဗ်အနီးမှာ မတ်လ ၂၂ ရက်က  အနည်းဆုံး လူ ၄ ဦးကို သတ်ဖြတ်ခဲ့ပြီး နိုင်ငံအရှေ့တောင်ပိုင်းရှိ ဇာပိုရစ်ချ်ဇီယာမြို့မှာ ရုရှားရဲ့ လေကြောင်းတိုက်ခိုက်မှုအတွင်း လူတဦး သေဆုံးခဲ့ကြောင်း ယူကရိန်းသမ္မတက ပြောကြားလိုက်ပါတယ်။

ဒီလုပ်ရပ်တွေဟာ မော်စကိုအနေနဲ့ ငြိမ်းချမ်းရေးအပေါ် စိတ်ဝင်စားမှု မရှိတာကို ပြသလိုက်တာဖြစ်တယ်လို့ ဆိုပါတယ်။

ကလေး ၃ ဦး အပါအဝင် အနည်းဆုံး လူ ၃၃ ဦး ထိခိုက်ဒဏ်ရာရရှိခဲ့တယ်လို့ ဒေသဆိုင်ရာ စစ်ဘက်အုပ်ချုပ်ရေး အကြီးအကဲဖြစ်သူက အတည်ပြုပါတယ်။

ယူကရိန်းမြို့တော်တောင်ဘက် မိုင် ၄၀ အကွာက ရီးရှက်ဖ်မြို့မှာ ညအချိန်ကာလအတွင်း ရုရှားဘက်က ဒရုန်းနဲ့တိုက်ခိုက်မှုကြောင့် အိပ်ဆောင် နှစ်ခုနဲ့အတူ ပညာရေးအဆောက်အအုံ အစိတ်အပိုင်းတချို့ ထိခိုက်ပျက်စီးသွားတယ်လို့ အမျိုးသားအရေးပေါ်ဝန်ဆောင်မှုဌာနက ပြောပါတယ်။

ဒေသစံတော်ချိန် မနက် ၃ နာရီမှာ ပေါက်ကွဲမှုတွေ ဆက်တိုက်ဖြစ်ပွားခဲ့ပြီးနောက် လူအယောက် ၂၀ ကို ဆေးရုံပို့ဆောင်ခဲ့ရပြီး နောက်ထပ် လူအများအပြား ပျောက်ဆုံးနေတယ်လို့ ဒေသဆိုင်ရာ ရဲချုပ် အန်ဒရီ နိုက်ဘီတော့ဗ်က ဆိုပါတယ်။

အရေးပေါ်ကယ်ဆယ်ရေးလုပ်သားတွေဟာ အိပ်ဆောင်တခုဆီကနေ ရုပ်အလောင်းတခု သယ်ထုတ်လာတဲ့ ဗီဒီယိုမှတ်တမ်းကိုလည်း ရဲချုပ်က ထုတ်ပြန်ခဲ့ပါတယ်။

အထပ် ၅ ထပ်ပါ အိပ်ဆောင်တခုရဲ့ အပေါ်ဆုံးထပ် နေရာအများအပြားဟာ ဒီတိုက်ခိုက်မှုကြောင့် ပြိုကျပျက်စီးသွားပါတယ်။

အဖြူရောင် အကာအကွယ်ဦးထုပ်နဲ့အတူ ရောင်ပြန်အင်္ကျီတွေ ဝတ်ဆင်ထားတဲ့ အလုပ်သမားတွေက ဆိုးဆိုးရွားရွား ပျက်စီးသွားတဲ့ နောက်ထပ်အဆောက်အဦတခုရဲ့ အပျက်အစီးပုံတွေကြားမှာ တွယ်တက်တိုးဝင်ကာ ပျောက်ဆုံးနေသူတွေကို ရှာဖွေခဲ့ကြပါတယ်။

နိုင်ငံမြောက်ပိုင်းကနေ ညတွင်းချင်း ပျံသန်းလာတဲ့ အီရန်နိုင်ငံထုတ် ရုရှားဒရုန်း ၂၁ စင်းထဲက ၁၆ စင်းကို ပစ်ချနိုင်ခဲ့ကြောင်း ယူကရိန်းစစ်တပ်က ပြောပါတယ်။