ယူကရိန်းနိုင်ငံ ဒွန်ညက်ခ်ဒေသရှိ  မော်စကိုထိန်းချုပ်ထားတဲ့အပိုင်းမှာ ရုရှားတပ်ဖွဲ့တွေအနေနဲ့ ဘတ်ခ်မွတ်မြို့ရဲ့ ၇၅ ရာခိုင်နှုန်းကျော်ကို ထိန်းချုပ်ထားနိုင်ပြီလို့  ရုရှားခန့်အပ်ထားတဲ့ အကြီးအကဲဖြစ်သူက ဧပြီလ ၁၀ ရက်မှာ ပြောကြားပါတယ်။

ဘတ်ခ်မွတ်မြို့ဟာ ၁၃ လတာ စစ်ရေးပဋိပက္ခအတွင်း သွေးထွက်သံယိုအများဆုံး တိုက်ပွဲတွေထဲက တစ်ခုဖြစ်ပြီး နှစ်ဖက်စလုံးက လူအသေအပျောက်များပြားမှုကြောင့် ပထမကမ္ဘာစစ်နဲ့ နှိုင်းယှဉ်ပြောဆိုကြပါတယ်။

မော်စကိုခန့်အပ်ထားတဲ့ ဒေသဆိုင်ရာခေါင်းဆောင်ဖြစ်သူ ဒန်းနစ်ပူရှီလင်ဟာ  ပြီးခဲ့တဲ့ နွေရာသီကတည်းက တိုက်ပွဲတွေဖြစ်ပွားနေတဲ့ မိုင်းတွင်းမြို့ငယ်လေးမှာ သူရောက်ရှိနေတဲ့ ဗီဒီယိုမှတ်တမ်းကို တယ်လီဂရမ်ကတဆင့် ထုတ်ပြန်ထားပါတယ်။ 

ဒီဗီဒီယိုထဲမှာ ပူရှီလင်အနေနဲ့ အပျက်အစီးတွေအကြား ကျည်ကာအင်္ကျီဝတ်ဆင်ကာ ပေါက်ကွဲသံတွေ ထွက်ပေါ်လာတာကိုလည်း ကြားနေရပါတယ်။

ပူရှီလင်က ဘတ်ခ်မွတ်မြို့ကို သွားရောက်ခဲ့ပြီးနောက် ရုရှားနိုင်ငံပိုင် ရော့စ် ဆီယာ-၂၄ တီဗီချန်နယ်မှာ ဒီမြို့ရဲ့  ၇၅ ရာခိုင်နှုန်းကျော်ဟာ ရုရှားတပ်ဖွဲ့တွေရဲ့  ထိန်းချုပ်မှုအောက်မှာရှိနေပြီ လို့ မှတ်ချက်ပေးခဲ့ပေမယ့် ဘတ်ခ်မွတ်မြို့  ကျဆုံးမှုအကြောင်း ပြောဖို့ကတော့ အချိန်စောလွန်းနေသေးတယ်လို့ သူက သတိပေးခဲ့ပါတယ်။

ဘတ်ခ်မွတ်မြို့ကို သိမ်းပိုက်နိုင်ခဲ့ရင် ယူကရိန်းနိုင်ငံတဝန်း နောက်ထပ်ထိုးစစ်တွေ လုပ်ဆောင်နိုင်မယ့် အလားအလာပွင့်လာနိုင်တယ်လို့ ရုရှားဘက်က ပြောဆိုခဲ့တဲ့ အပေါ်မှာ ကိဗ် အပါအဝင် အနောက်နိုင်ငံတွေ  ဒီမြို့ဟာ အထိမ်းအမှတ်အရသာ အရေးပါတာဖြစ်ကြောင်း တုံ့ပြန်ပါတယ်။