သြစတြေးလျရဲတပ်ဖွဲ့နဲ့ အခွန်အရာရှိတွေဟာ နယူးဆောက်ဝေးလ်ပြည်နယ်၊ မူးရ်ဂါမြို့ရှိ အိမ်ရာတအိမ်ကို  ဝင်ရောက်စီးနင်းခဲ့တာမှာ တရားမဝင် ဆေးရွက်ကြီး တန်ချိန် ၁၆ တန်လောက်ကို သိမ်းဆည်းရမိပြီး ဖျက်ဆီးခဲ့ကြောင်း ပြည်နယ်ရဲတပ်ဖွဲ့က ပြောပါတယ်။ 

ဆစ်ဒနီမြို့ အနောက်မြောက်ဘက် ကီလိုမီတာ ၁၅၀ အကွာမှာ တရားမဝင် ဆေးရွက်ကြီး စိုက်ပျိုးနေကြောင်းကို မနှစ်က သတင်းရရှိပြီးနောက်မှာ ဧပြီ ၅ ရက် မနက် ၁၀ နာရီလောက်က စီးနင်းခဲ့တာဖြစ်ကြောင်း ရဲတပ်ဖွဲ့ကပြောကြားခဲ့ပါတယ်။

ဒီဖမ်းဆီးရမိမှုဟာ ယစ်မျိုးပစ္စည်း ပြည်တွင်းစည်းကြပ်ခွန် ဒေါ်လာ ၂၈ သန်းကျော် ခန့်မှန်းခြေ ရှိတယ်လို့ ရဲတပ်ဖွဲ့က ပြောပါတယ်။

ဒီအမှုမှာပါဝင်ပတ်သက်သူတွေကိုတော့ ဖမ်းဆီးရမိခြင်း မရှိသေးကြောင်းနဲ့ စုံစမ်းမှုတွေကို ဆက်လုပ်ဆောင်နေကြောင်းလည်း ရဲတွေက ဆိုပါတယ်။

သြစတြေးလျမှာ သင့်လျော်တဲ့ ယစ်မျိုးလိုင်စင်မရှိဘဲ ဆေးရွက်ကြီးစိုက်ပျိုးခြင်းက တရားမဝင်ပါဘူး။

ဩစတေးလျအခွန်ရုံးရဲ့ အဆိုအရ ဩစတေးလျမှာ ၂၀၀၆ ခုနှစ်ကတည်းက လိုင်စင်ရ ဆေးရွက်ကြီး စိုက်ပျိုးသူမရှိသေးသလို ၂၀၁၅ ခုနှစ်ကတည်းက လိုင်စင်ရ ဆေးရွက်ကြီး ထုတ်လုပ်သူ မရှိသေးပါဘူး။